قىتاي پروۆينتسيالارىنىڭ بىرىنەن 21 قورىم تابىلدى
«بۇل قورىمدار شامامەن 780 مەتر جەردە ورنالاسقان، بۇعان دەيىن تابىلعان يمپەريالىق كەسەنەگە تيەسىلى»، - دەپ حابارلادى چاڭشا مادەني مۇرا جانە ارحەولوگيا ينستيتۋتى.
بارلىق جەرلەۋ ورىندارىندا شۇڭقىرلار بار جانە ولاردى ەكى تۇرگە بولۋگە بولادى - وتكەلدەرى بار جانە وتكەلسىز قورىمدار. ولاردىڭ كوبى ءبىر- بىرىنە جاقىن جاتىر. بۇل جەردە ەرلى- زايىپتىلار نەمەسە ءبىر وتباسى مۇشەلەرى جەرلەنگەن بولۋى مۇمكىن.
سونىڭ ىشىنەن ارحەولوگتار ەرەكشە قورىم تاپتى. ولاردىڭ ايتۋىنشا، بۇل حۋنان پروۆينتسياسىندا سيرەك كەزدەسەتىن ەكى قاباتتى جەرلەۋ ورنى.
«ەگەر ءبىزدىڭ بولجامدارىمىز راستالسا، بۇل حان اۋلەتى كەزىندەگى ەكى دەڭگەيلى قۇرىلىمدى جەرلەۋلەردىڭ دامۋى مەن تارالۋىن زەرتتەۋ ءۇشىن ماڭىزدى اقپارات بەرەدى»، - دەيدى قازبا جوباسىنىڭ جەتەكشىسى جوۋ باودۋن.
ورنالاسقان جەرىنىڭ جاقىندىعىن جانە جاسىنىڭ ۇقساستىعىن ەسكەرە وتىرىپ، ارحەولوگتار بۇل قورىمدار كونە يمپەراتورلىق كەسەنەگە تيەسىلى بولۋى مۇمكىن دەگەن قورىتىندىعا كەلدى.
چجوۋ باودۋننىڭ ايتۋىنشا، جاڭا ولجالار باتىس حان اۋلەتى كەزىندەگى قازىرگى چاڭشا قالاسىنىڭ جەرلەۋ جۇيەسىن زەرتتەۋ ءۇشىن ماڭىزدى اقپارات بەرە الادى.
بۇعان دەيىن قىتايدىڭ وڭتۇستىگىندەگى گۋاڭدۋن پروۆينتسياسىنىڭ اكىمشىلىك ورتالىعى گۋاڭجوۋدا حان اۋلەتىنەن (ب. ز. د. 202 - ب. ز. 220 ج. ) چيڭ اۋلەتىنە (1644-1911 ج ج. ) دەيىنگى كەزەڭگە جاتاتىن 184 تاريحي ەسكەرتكىش، سونداي- اق ءبىرقاتار مادەني جادىگەرلەر تابىلعانى حابارلانعان بولاتىن.
فوتو: embassylife.ru
اۆتور
سماعۇلوۆا ەركەجان