ءاربىر بالاعا 21 مىڭ تەڭگە تولەۋ ءۇشىن زاڭناماعا وزگەرىس ەنگىزۋ كەرەك - دەپۋتات التايەۆ

استانا. قازاقپارات - پارلامەنت ءماجىلىسىنىڭ دەپۋتاتى نۇرجان التايەۆ كوپبالالى وتباسىلاردىڭ جاردەماقىسىن كوتەرۋگە قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«بۇل - وتە ماڭىزدى، وتە كەرەك نارسە. ويتكەنى مەن اناۋ كۇندەرى دە ايتىپ ءجۇردىم، قازىرگى الەۋمەتتىك كومەك، اسىرەسە، كوپبالالى وتباسىلارعا بەرىلەتىن جاردەماقى جەتكىلىكسىز. ەندى، ەلباسى وتە كەرەمەت ءبىر تاپسىرمانى بەردى. جاعدايى تومەن كوپبالالى وتباسىلاردا ءاربىر بالاعا 21 مىڭ تەڭگەدەن اي سايىن تولەنەتىن بولدى. ونداي كومەك ءتورت جانە ودان كوپ بالاسى بار وتباسىلارعا بەرىلەدى»، - دەدى ن. التايەۆ قازاقپارات تىلشىسىنە بەرگەن سۇحباتىندا.

دەپۋتاتتىڭ ايتۋىنشا، اتالعان تاپسىرما تەز ارادا ورىندالۋى ءتيىس. ول ءۇشىن ءتيىستى زاڭناماعا وزگەرىستەردى ەنگىزۋ كەرەك. «مەن ويلايمىن، ۇكىمەت تەز ارادا زاڭنامالارعا وزگەرىس ەنگىزەدى دە، جاقىن ارادا اتالعان تولەمدەر بەرىلە باستايدى. ويتكەنى پرەزيدەنتتىڭ ءوزى ايتتى، وسى جىلدان باستاپ تولەۋ كەرەك. ەلباسىنىڭ تاپسىرماسى بولعاننان كەيىن ونى تەز ارادا ىسكە اسىراتىن بولادى»، - دەپ اتاپ كورسەتتى ن. التايەۆ.

ايتا كەتەيىك، كەشە «نۇر وتان» پارتياسىنىڭ XVIII سەزىندە مەملەكەت باسشىسى نۇرسۇلتان نازاربايەۆ كوپبالالى وتباسىلاردا ءاربىر بالانىڭ تولەماقىسىن 21 مىڭ تەڭگەگە دەيىن ارتتىرۋدى تاپسىردى.

«ۇكىمەتكە الەۋمەتتىك جاعىنان از قامتىلعان ازاماتتاردى، اسىرەسە، كوپبالالى وتباسىلاردى قولداۋ شارالارىن كەڭەيتۋدى تاپسىرامىن. اتالعان كورسەتكىشتى كۇنكورىس دەڭگەيىنىڭ 70 پايىزىنا دەيىن جەتكىزۋىمىز كەرەك. ال اتاۋلى كومەك الىپ وتىرعان كوپبالالى وتباسىلاردىڭ ءاربىر بالاسىنا بەرىلەتىن جاردەماقىنى 21 مىڭ تەڭگەگە دەيىن ءوسىرۋدى تاپسىرامىن. اتالعان كومەكتى بارىنشا جەڭىلدەتۋ كەرەك. حالىق ارى-بەرى شاپقىلاپ جۇرمەسىن. سوسىن ونداي وتباسىلاردىڭ تابىسىن ەسەپتەگەندە باسقا الەۋمەتتىك جاردەماقىلاردى ساناۋدى الىپ تاستاۋ قاجەت. ايتپەسە، سونىڭ ءبارىن ساناعاندا كوپبالالى وتباسىلار باي ازاماتتار بولىپ شىعا كەلەدى»، - دەپ اتاپ كورسەتتى ن. نازاربايەۆ.