ءار بالاعا - 21 مىڭ تەڭگە: كوپبالالى وتباسىلاردىڭ جاردەماقىسى قالاي ەسەپتەلەدى
ونىڭ سوزىنە قاراعاندا، الدىمەن كوپبالالى وتباسىنىڭ تابىسى ەسەپتەلەدى. ال جاڭا جاردەماقى تابىسى تومەن وتباسىلارعا عانا تولەنەدى.
«بۇل - الەۋمەتتىك جاعىنان از قامتىلعان وتباسىلارعا ارنالعان كومەك. جاعدايى جاقسى وتباسىلار ونداي كومەككە ءزارۋ ەمەس دەپ ويلايمىن. ال كەدەيشىلىك دەڭگەيىنەن تومەن وتباسىلارعا كومەكتەسۋ كەرەك. پرەزيدەنت ايتقانداي، كەدەيشىلىكتىڭ دەڭگەيى كۇنكورىس مينيمۋمىنىڭ 50 پروتسەنتىنەن 70 پروتسەنتكە دەيىن كوتەرىلەدى. بۇدان بولەك، الەۋمەتتىك كومەكتى الۋ شارالارى جەڭىلدەيدى. دەمەك، الەۋمەتتىك جاعىنان از قامتىلعان كوپبالالى وتباسىلاردا ءاربىر بالاعا 21 مىڭ تەڭگەگە جۋىق جاردەماقى تولەنەدى. ناقتى ايتساق، 20789 مىڭ تەڭگە. ونداي كومەكتى ءتورت جانە ودان كوپ بالاسى بار وتباسىلار الادى»، - دەدى ءا. سمايىلوۆ جۋرناليستەرگە بەرگەن سۇحباتىندا.
ونىڭ ايتۋىنشا، سوڭعى ەكى جىلدىڭ ىشىندە الەۋمەتتىك سالاعا رەسپۋبليكالىق بيۋدجەتتەن بولىنگەن قارجىنىڭ كولەمى 34 پروتسەنتتەن 45 پروتسەنتكە دەيىن ارتتى. الداعى ءۇش جىلدا اتالعان كورسەتكىشتى 49 پروتسەنتكە دەيىن ۇلعايتۋ جوسپارلانىپ وتىر.
«بۇگىن مەملەكەت باسشىسى قوسىمشا تاپسىرمالار بەردى. سونىڭ اياسىندا الەۋمەتتىك جاعىنان از قامتىلعاندار، سونىڭ ىشىندە كوپابالالى وتباسىلاردى قولداۋ شارالارى كۇشەيەدى. پرەزيدەنت اتاۋلى كومەكتى ارتتىرۋدى جۇكتەدى. باسپانامەن قامتۋ بار. جەرگىلىكتى جەردە ينفراقۇرىلىمدىق نىسانداردى سالۋ قاجەت. سونىڭ بارلىعىنا الداعى ەكى-ءۇش جىلدا قوسىمشا 2 تريلليون تەڭگە بولىنەدى. شامامەن 1 تريلليون تەڭگە ۇلتتىق قوردان قۇيلادى»، - دەپ اتاپ كورسەتتى ءا. سمايىلوۆ.
ايتا كەتەيىك، بۇگىن مەملەكەت باسشىسى نۇرسۇلتان نازاربايەۆ كوپبالالى وتباسىلاردا ءاربىر بالانىڭ تولەماقىسىن 21 مىڭ تەڭگەگە دەيىن ارتتىرۋدى تاپسىردى.
«ۇكىمەتكە الەۋمەتتىك جاعىنان از قامتىلعان ازاماتتاردى، اسىرەسە، كوپبالالى وتباسىلاردى قولداۋ شارالارىن كەڭەيتۋدى تاپسىرامىن. اتالعان كورسەتكىشتى كۇنكورىس دەڭگەيىنىڭ 70 پايىزىنا دەيىن جەتكىزۋىمىز كەرەك. ال اتاۋلى كومەك الىپ وتىرعان كوپبالالى وتباسىلاردىڭ ءاربىر بالاسىنا بەرىلەتىن جاردەماقىنى 21 مىڭ تەڭگەگە دەيىن ءوسىرۋدى تاپسىرامىن. اتالعان كومەكتى بارىنشا جەڭىلدەتۋ كەرەك. حالىق ارى- بەرى شاپقىلاپ جۇرمەسىن. سوسىن ونداي وتباسىلاردىڭ تابىسىن ەسەپتەگەندە باسقا الەۋمەتتىك جاردەماقىلاردى ساناۋدى الىپ تاستاۋ قاجەت. ايتپەسە، سونىڭ ءبارىن ساناعاندا كوپبالالى وتباسىلار باي ازاماتتار بولىپ شىعا كەلەدى»، - دەپ اتاپ كورسەتتى ن. نازاربايەۆ.