كوپبالالى وتباسىلاردا ءاربىر بالاعا 21 مىڭ تەڭگە تولەنەدى - نۇرسۇلتان نازاربايەۆ

استانا. قازاقپارات - مەملەكەت باسشىسى نۇرسۇلتان نازاربايەۆ كوپبالالى وتباسىلاردىڭ جاردەماقىسىن ارتتىرۋدى تاپسىردى، دەپ حابارلايدى قازاقپارات ءتىلشىسى.

پرەزيدەنتتىڭ ايتۋىنشا، الەۋمەتتىك جاعىنان از قامتىلعان ازاماتتارعا قولداۋ شارالارىن كۇشەيتۋ كەرەك. اسىرەسە، كوپبالالى وتباسىلارعا دەگەن كومەك بارىنشا سەزىلۋى شارت.

«بۇگىندە ەلىمىزدە شامامەن 340 مىڭ وتباسىدا ءتورت بالا بار. قازىردىڭ وزىندە جىل سايىن كوپبالالى وتباسىلارعا 500 ميلليارد تەڭگەدەن استام قارجى ءبولىنىپ تۇرادى. ءبىراق اتالعان ساناتتاعى وتباسىلاردىڭ تابىسى ءارتۇرلى. بىرەۋى تابىستى كوپ تابادى، ەندى بىرەۋى از تابادى. سوندىقتان قولداۋ شارالارىن جاساعاندا وسىنى ەسكەرۋ كەرەك. جاقسى تابىسى بارلارعا قولداۋ جاساۋدىڭ قاجەتى قانشا. سول سەبەپتى ەڭ الدىمەن تابىسى تومەن كوپبالالى وتباسىلارعا كومەك بەرگەن ءجون»، - دەدى ن. نازاربايەۆ «نۇر وتان» پارتياسىنىڭ XVIII سەزىندە.

ەلباسىنىڭ سوزىنە قاراعاندا، قازىرگى كەزدە اتاۋلى كومەكتى 111 مىڭ كوپبالالى وتباسى الادى.

«ۇكىمەتكە الەۋمەتتىك جاعىنان از قامتىلعان ازاماتتاردى، اسىرەسە، كوپبالالى وتباسىلاردى قولداۋ شارالارىن كەڭەيتۋدى تاپسىرامىن. اتالعان كورسەتكىشتى كۇنكورىس دەڭگەيىنىڭ 70 پايىزىنا دەيىن جەتكىزۋىمىز كەرەك. ال اتاۋلى كومەك الىپ وتىرعان كوپبالالى وتباسىلاردىڭ ءاربىر بالاسىنا بەرىلەتىن جاردەماقىنى 21 مىڭ تەڭگەگە دەيىن ءوسىرۋدى تاپسىرامىن. اتالعان كومەكتى بارىنشا جەڭىلدەتۋ كەرەك. حالىق ارى-بەرى شاپقىلاپ جۇرمەسىن. سوسىن ونداي وتباسىلاردىڭ تابىسىن ەسەپتەگەندە باسقا الەۋمەتتىك جاردەماقىلاردى ساناۋدى الىپ تاستاۋ قاجەت. ايتپەسە، سونىڭ ءبارىن ساناعاندا كوپبالالى وتباسىلار باي ازاماتتار بولىپ شىعا كەلەدى»، - دەپ اتاپ كورسەتتى ن. نازاربايەۆ.

ايتا كەتەيىك، بيىل «نۇر وتان» پارتياسىنىڭ قۇرىلعانىنا 20 جىل تولىپ وتىر. وسى ۋاقىتقا دەيىن رەسپۋبليكا بويىنشا 1 ميلليوننان استام ادامعا پارتيا بيلەتتەرى تابىستالدى. ۇيىمعا مۇشە ازاماتتاردىڭ 62 پايىزى - ايەلدەر. ال 29-40 جاس ارالىعىنداعى مۇشەلەردىڭ سانى 27 پايىزدى قۇرايدى.