رەسەيدە 20 شاقتى ادام قولدان جاسالعان ىشىمدىكتەن ۋلانىپ ءولدى
الدىن الا مالىمەت بويىنشا، توتەنشە جاعدايدىڭ ورىن الۋىنا سامارا قالاسىندا وندىرىلگەن «ميستەر سيدر» سۋسىندارى سەبەپ بولعان.
روسپوترەبنادزور باسشىسى اننا پوپوۆا بۇل ءونىمدى ساتىلىمنان الىپ تاستاۋدى تاپسىردى.
سۋرروگات الكوگولدەن ۋلانۋدىڭ العاشقى فاكتىلەرى نيجەگورود وبلىسىندا تىركەلدى.
ۋليانوۆ وبلىسىندا 16 ادام قايتىس بولدى. ايماق باسشىسى الەكسەي رۋسسكيح وبلىستا بارلىعى 40 ادام ۋلانعانىن مالىمدەدى.
ديميتروۆگراد باسشىسى اندرەي بولشاكوۆ وڭىردە سۋرروگات الكوگولدەن زارداپ شەككەندەر سانى 28 ادامعا دەيىن وسكەنىن حابارلادى.
سامارا وبلىسىنىڭ نوۆوكۋيبىشيەۆسكىندە سيدر ءىشىپ ۋلانعان ەكى ايەل قايتىس بولدى.
كەيىننەن دەنساۋلىق ساقتاۋ مينيسترلىگى وڭىرلىك بولىمشەسىنىڭ باسپا ءسوز قىزمەتىنەن جالپى جەتى ادامنىڭ اۋرۋحاناعا جاتقىزىلعانى حابارلاندى.
ۋدمۋرتيادا الكوگولدەن ۋلانۋدىڭ ەكى وقيعاسى تىركەلگەن. ۋلانعان ەر ادام مەن ايەلدىڭ جاعدايى وتە اۋىر.
تەرگەۋ ۋلانعانداردىڭ بارلىعى «ميستەر سيدر» سۋسىنىن ىشكەنىن انىقتادى. جۇرت بۇل سۋسىندى «تەرريتوريا پيۆا» جانە «بير حاۋس» جەلىلەرىنەن قۇيعىزىپ ساتىپ العان.
ۋليانوۆ گۋبەرناتورى توتەنشە جاعدايدىڭ ورىن الۋىنا سەبەپ بولعان الكوگول قۇرامىندا مەتانول بولعانىن مالىمدەدى.
اتالعان جاعداي بويىنشا ءتيىستى تەرگەۋ امالدارى باستالدى. ءونىمدى جەتكىزگەن جەكە كاسىپكەر ۇستالدى.