اۆستراليادا ءتورت بالاسىن ولتىرگەنى ءۇشىن 20 جىل تۇرمەدە وتىرعان ايەل عىلىمنىڭ ارقاسىندا بوستاندىققا شىقتى
2003 -جىلى سوت كەتلين فولبيگتى قورعاۋشى تاراپتىڭ ايتقانىنا سەنبەي، 4 بالاسىنىڭ ءبارى تۇگەل تابيعي سەبەپتەن قايتىس بولۋى ەكىتالاي دەپ سانادى.
ءبىراق جاقىندا عالىمدار وسىنى دالەلدەيتىن جاڭا زەرتتەۋ جاساپ شىعاردى.
القابيلەر سوتى 10 جىل ىشىندە ۇلدارى كالەب پەن پاتريكتى، قىزدارى سارا مەن لاۋرانى ولتىرگەنى ءۇشىن ايىپتى دەپ تانىپ، ۇكىم شىعارعان سوڭ كەتلين فولبيگگ «اۆسترالياداعى ەڭ قورقىنىشتى كىسى ءولتىرۋشى» اتانعان.
فولبيگگ 1989-1999 -جىلدار ارالىعىندا كىشكەنتاي ءتورت بالاسى كەنەتتەن قايتىس بولعاننان كەيىن قاماۋعا الىندى.
سوتتا پروكۋرورلار ايەل ولاردى تۇنشىقتىرىپ ءولتىردى دەپ مالىمدەدى.
بۇل رەتتە بالالاردىڭ دەنەسىنەن ەشقانداي بۋىندىرۋ ءىزى نەمەسە قانداي دا ءبىر جاراقات تۋرالى زاتتاي دالەل كەلتىرىلگەن جوق.
اقىرى فولبيگگ جاناما دالەل نەگىزىندە سوتتالدى: ول جەكە كۇندەلىگىنە انا بولۋ وڭاي ەمەس ەكەنىن جانە بالالاردىڭ ولىمىنە ءوزىن كىنالايتىنىن جازعان.
كەيىننەن فولبيگتىڭ قورعاۋشىلارى بىرنەشە رەت اپەللياتسيا بەرىپ، 2019 -جىلى ءىستىڭ قايتا تەرگەلۋىنە باستاماشى بولدى، الايدا بۇدان ەش ناتيجە شىقپادى.
تەرگەۋ امالدارىن وتستاۆكاداعى سۋديا توم باتەرست جۇرگىزگەن سوڭ ءىستىڭ جاڭا ءمان- جايى انىقتالدى.
پروكۋرورلاردىڭ كوزقاراسىن وزگەرتۋگە نەگىز بولعان سەبەپ - يممۋنولوگتار توبىنىڭ تۇجىرىمى بولدى.
ولار جۇرگىزگەن زەرتتەۋ ارقىلى فولبيگتىڭ قىزدارى سارا جانە لاۋرادان جۇرەكتىڭ كەنەتتەن توقتاپ قالۋىنا اكەلەتىن calm 2 G114R دەپ اتالاتىن جالپى گەنەتيكالىق مۋتاتسيا انىقتالعان.
ال ۇلدارى كالەب پەن پاتريكتەن عالىمدار باسقا گەنەتيكالىق مۋتاتسيانى تاپتى.
زەرتتەۋ توبىن باسقارعان اۆستراليا ۇلتتىق ۋنيۆەرسيتەتىنىڭ پروفەسسورى كارولا ۆينۋەسانانىڭ ايتۋىنشا، الەمدە وسى گەنەتيكالىق مۋتاتسيامەن بايلانىستى ولىمگە اكەلە الاتىن جۇرەك اۋرۋىنا ۇشىراۋدىڭ نەبارى 134 وقيعاسى بەلگىلى.
جاڭا ۋەلس گۋبەرناتورى تولىق راقىمشىلىق تۋرالى جارلىققا قول قويىپ، فولبيگتى دەرەۋ تۇرمەدەن بوساتۋدى بۇيىردى.
اۆستراليا عىلىم اكادەمياسىنىڭ مالىمدەمەسىندە بۇل ءىس ەلدەگى قۇقىق جۇيەسىن عىلىمداعى پروگرەستى ەسكەرە وتىرىپ رەفورمالاۋ قاجەتتىگىن كورسەتەدى دەلىنگەن.
اۆتور:
زارينا تۋعانبايەۆا