فرانسيادا 20 جىلعا سوتتالعان قازاقستاندىق كىناسىز دەپ تانىلدى
بۇل تۋرالى قازاقپارات ءتىلشىسى حابار 24 تەلەارناسىنا سىلتەمە جاساپ حابارلايدى.
وسىدان 11 جىل بۇرىن قاراعاندىلىق سوفيا بودنارچۋك فرانسياعا اتتانىپ، سول ەلدىڭ ازاماتىنا تۇرمىسقا شىققان. دەگەنمەن 2016 -جىلى ونىڭ جۇبايى سوفيا مەن ەكى جاسار قىزىنىڭ كوزىنشە ءوز اتا- اناسىن اتىپ ءولتىردى.
وقيعادان كەيىن قازاقستاندىق بەس جارىم جىلعا جۋىق ۋاقىتىن فرانسۋز تۇرمەسىندە وتكىزدى. وعان بۇل ىستە سىبايلاس بولدى دەگەن ايىپ تاعىلدى. سوت پروتسەسىندە كۇيەۋىنىڭ تۋىستارى جالداعان 6 ادۆوكات سوفيا بودنارچۋككە قارسى ءسوز سويلەدى.
بۇل ارالىقتا سوفياعا وتانداستارى قولداۋ ءبىلدىردى. كەيىن بۇل ىسكە بىلگىلى زاڭگەر ەدۋارد مارسيال كىرىستى.
«مەن جالعىز قالدىم. نە فرانسۋز ءتىلىن، نە زاڭ بىلمەيمىن. دەگەنمەن مەنى ەلشىلىك وكىلدەرى قولدادى. بۇرىنعى ەلشى جان عاليەۆ پەن زاڭ كەڭەسشىسى رۇستەم ءومىرزاقوۆقا العىسىمدى بىلدىرەمىن. وسى جىلدار ىشىندە ولار ماعان قولداۋ كورسەتتى، سوت پروتسەستەرىندە بولدى»، - دەدى سوفيا بودنارچۋك.
ادۆوكات ەدۋارد ءمارسيالدىڭ ايتۋىنشا، ادىلەتسىز ۇكىمنىڭ باستى سەبەبى - وزگەلەردىڭ نەمقۇرايدىلىعى.
«ونى ءارقاشان سىبايلاس رەتىندە قاراستىردى. ونىڭ ايعاقتارىنا سەنىمسىزدىك تانىتتى. سالدارىنان سوتتا سوفياعا باي فرانسۋزدىڭ مۇلكىن يەمدەنبەك بولعان دەپ كۇمان كەلتىرىلدى. ول سوت ۇكىمىمەن 20 جىلعا باس بوستاندىعىنان ايىرىلدى. بۇل مەن ءۇشىن كۇتپەگەن شەشىم بولدى. مەن قاي جەردە، قانداي اعاتتىق جىبەرگەنىمدى تۇسىنبەدىم»، - دەدى ادۆوكات ەدۋارد مارسيال.
الايدا، سوڭىندا ءىس سوفيا بودنارچۋكتىڭ پايداسىنا شەشىلدى. ەندى فرانسيا تاراپى ادىلەتسىز ۇكىمنەن كەلتىرىلگەن زالالدى وتەۋى ءتيىس. ءوزىنىڭ كىناسىزدىگىن دالەلدەگەن قازاقستاندىق ەندى اتا- انا قۇقىعىن قايتارۋعا نيەتتى.