الماتىدا 20 ميلليون تەڭگەگە دەيىن قانداي پاتەر ساتىپ الۋعا بولادى؟

None
استانا. قازاقپارات - Krisha.kz ساراپشىلارى الماتىنىڭ جىلجىمايتىن مۇلىك نارىعىندا قۇنى 20 ميلليون تەڭگەگە دەيىن قانداي پاتەر ساتىپ الۋعا بولاتىنىن زەرتتەدى.

الماتىدا 20 ميلليون تەڭگەگە دەيىنگى باسپانا

بۇگىندە Krisha.kz سايتىندا 20 ميلليون تەڭگەگە دەيىنگى تۇرعىن ءۇيدى ساتۋ تۋرالى 3,5 مىڭنان اسا حابارلاندىرۋ جاريالانعان.

ولاردىڭ ىشىندە:

1950-1999-جىلدارى سالىنعان ۇيلەردەگى پاتەر - 35 پايىز؛

جەكەشەلەندىرىلگەن جاتاقحانالارداعى بولمە - 30 پايىز؛

جەكە ۇيلەر - 15 پايىز؛

2000-2021-جىلدارى سالىنعان ۇيلەردەگى پاتەر - 10 پايىز؛

سالىنىپ جاتقان تۇرعىن ءۇي كەشەندەرىندەگى پاتەر - 10 پايىز.

بۇل سەگمەنتتەگى ۇسىنىستىڭ كوپشىلىگى قالانىڭ ەسكى تۇرعىن ءۇي قورىنداعى 1 جانە 2 بولمەلى پاتەرلەر (كوبىنە 1960-1970-جىلدارداعى ۇيلەردە) جانە جاتاقحانا بولمەلەرى. سونداي-اق، سالىنىپ جاتقان تۇرعىن ءۇي كەشەندەرىندەگى پاتەرلەر مەن 2000-جىلدارى سالىنعان ۇيلەردەگى پاتەرلەر بار.

جەكە سەكتورعا كەلەتىن بولساق، بۇل باعادا 600 گە جۋىق نىسان بار. ونىڭ كوپشىلىگى شاعىن ۋچاسكەسى بار ءۇيدىڭ ءبىر بولىگى نەمەسە جارتىسى.

جاتاقحانا بولمەلەرى

بۇل - ەڭ بيۋجەتتى تۇرعىن ءۇي. 20 ميلليون تەڭگەگە دەيىنگى ۇسىنىستاردىڭ 30 پايىزى جاتاقحانا بولمەلەرىنەن. الماتىدا ولار - نەگىزىنەن كىرپىش پەن پانەلمەن قالانعان ءتورت قاباتتى ۇيلەر.

الماتىداعى جاتاقحانانىڭ ەڭ تومەن باعاسى - 5,3 ميلليون تەڭگە.

باعاعا اسەر ەتەتىن ءۇش نەگىزگى فاكتور بار:

تۇرمىس جاعدايى. قۇنى 10 ميلليون تەڭگەگە دەيىنگى جاتاقحانادا ءار قاباتتا اس ءۇي، دارەتحانا جانە دۋش ورتاق؛

ورنالاسقان جەرى. ەڭ قىمبات جاتاقحانالار اۋەزوۆ جانە المالى اۋداندارىندا، ەڭ ارزانى تۇركسىب پەن جەتىسۋدا؛

بولمەنىڭ اۋدانى. بولمەنىڭ اۋدانى كىشكەنتاي بولعاندىقتان، ءاربىر مەتر ماڭىزدى، ال ول نەعۇرلىم ۇلكەن بولسا، سوعۇرلىم قىمباتىراق بولادى. بولمەنىڭ ستاندارتتى اۋدانى 10 نان 15 شارشى مەترگە دەيىن وزگەرەدى.

جاتاقحانا - كەز كەلگەن باستاما ءۇشىن تاماشا مۇمكىندىك. مۇندا تۇرىپ پاتەرگە اقشا جيناۋ الدەقايدا وڭاي. ۋاقىت وتە كەلە بولمەنى ساتۋعا جانە ىڭعايلى ءۇي ساتىپ الۋعا بولادى.

الماتىدا جاتاقحانا ورنالاسقان كوپ ءۇي توزىعى جەتكەن دەپ تانىلىپ، جوندەۋ باعدارلاماسى بويىنشا بۇزىلسا، بولمە يەسى تولىققاندى ءبىر بولمەلى پاتەر الادى.

الماتىداعى ەڭ ارزان پاتەر قانشا تۇرادى

الماتىدا بۇگىندە 16-20 ميلليون تەڭگەگە قالانىڭ ءار جەرىنەن 1 جانە 2 بولمەلى پاتەر الۋعا بولادى. ۇسىنىستاردىڭ باسىم بولىگى تۇركسىب، جەتىسۋ، اۋەزوۆ جانە الاتاۋ اۋداندارىندا. بۇل ەسكى تۇرعىن ءۇي قورىنداعى پاتەرلەر - 1960-1975-جىلدارى سالىنعان كىرپىش جانە قامىس ۇيلەر. سونىمەن قاتار، 1980-1990-جىلدارى سالىنعان پانەل ۇيلەردە دە ۇسىنىستار بار.

مۇنداي پاتەر باعاسى 15,5 ميلليون تەڭگەدەن باستالادى.

الماتىداعى جاڭا تۇرعىن ءۇي كەشەندەرىندەگى 20 ميلليون تەڭگەگە دەيىن پاتەرلەر

Krisha.kz سايتىندا 16-20 ميلليونعا ءسىز سالىستىرمالى تۇردە جاڭا تۇرعىن ءۇي كەشەنىنەن 1 بولمەلى پاتەر تابا الاسىز. بۇل باعاداعى كوپ پاتەر الاتاۋ جانە ناۋرىزباي اۋداندارىندا ورنالاسقان. جەتىسۋ جانە تۇركسىب اۋداندارىندا دا بۇل باعادا پاتەرلەر بار.

جەر ۇيلەر

15-20 ميلليون تەڭگەگە 1,5-4 سوتىق شاعىن جەر ۋچاسكەسى بار 2، 3 بولمەلى جەر ءۇيدىڭ دە يەسى بولا الاسىز. كوبىنە بۇل 1950-1980-جىلدارى سالىنعان ۇيلەر. ورنالاسقان جەرى - تۇركسىب جانە جەتىسۋ اۋداندارى.

سالىنىپ جاتقان تۇرعىن ءۇي كەشەندەرىندەگى پاتەرلەر

سالىنىپ جاتقان تۇرعىن ءۇي كەشەندەرىندە پاتەردى 20 ميلليون تەڭگەگە دەيىن ساتىپ الۋعا بولادى. قۇرىلىستى اياقتاۋ مەرزىمى وسى نەمەسە كەلەسى جىلعا جوسپارلانعان جاڭا عيماراتتاعى پاتەردى كورسەتىلگەن سوماعا قاراي الاسىز. بۇل پاتەرلەر باعاسى 15 ميلليوننان باستالادى.

كوبىنە مۇنداي باعاداعى پاتەرلەر سكد ناۋرىزباي جانە الاتاۋ اۋداندارىندا، سونداي-اق، قالا ماڭىندا، قۇلجا تاسجولىنىڭ بويىندا، گرەس اۋدانىندا، «التىن وردا» بازارىنىڭ ارتىندا ورنالاسقان.

سوڭعى جاڭالىقتار