قازاق تىلىندە 20 جاڭا مۋلتفيلم جاسادى

الماتى. قازاقپارات - ق ر مادەنيەت جانە سپورت ءمينيسترى داۋرەن ابايەۆ «قازاق انيماتسيا» شىعارماشىلىق بىرلەستىگىنىڭ جۇمىسىمەن تانىستى، دەپ حابارلايدى قازاقپارات ءتىلشىسى.

قازاقستاندىق انيماتسياعا بيىل 55 جىل تولدى. شاكەن ايمانوۆ اتىنداعى «قازاق فيلم» كينوستۋدياسى جانىنان «قازاق انيماتسيا» شىعارماشىلىق بىرلەستىگى (ش ب) اشىلىپ، قازاق مۋلتيپليكاتسياسىنىڭ جۇمىسى قايتا جانداندى. بۇگىنگى تاڭدا «قازاق انيماتسيا» شىعارماشىلىق بىرلەستىگى كونكۋرستىق نەگىزدە رەسپۋبليكانىڭ ءىرى قالالارىنان مالىمدەلگەن 167 سەناري ىشىنەن ۇزدىك 20 سىن تاڭداپ، 5 مينۋتتىق انيماتسيالىق كارتينالاردان تۇراتىن 20 پيلوتتىق جوبانى اياقتاپ ۇلگەردى.

«2022- جىل ۇلتتىق انيماتسيالىق كينو ونەرى ءۇشىن ايتۋلى جىل بولدى. سەبەبى بيىل قازاق انيماتسيالىق كينو ونەرىنە 55 جىل تولدى. انيماتسيا سالاسى مايتالماندارىنىڭ تالاي جىلدان بەرگى ارمانى ورىندالىپ، شاكەن اتامىزدىڭ اتىنداعى «قازاق فيلم» كينونوستۋدياسى جانىنان «قازاق انيماتسيا» شىعارماشىلىق بىرلەستىگى جاڭادان جاساقتالىپ، قايتا قۇرىلدى. 1967-جىلى قازاق مۋلتيپليكاتسياسىنىڭ نەگىزىن قالاۋشى، رەجيسسەر امەن قايداردىڭ «قارلىعاشتىڭ قۇيرىعى نەگە ايىر؟» اتتى تۇڭعىش فيلمىنەن باستاۋ العان قازاق انيماتسيالىق كينو ونەرى ەلىمىزدىڭ كەلەشەگى جاس ۇرپاققا جارتى عاسىردان استام ۋاقىت بويى تولاسسىز قىزمەت ەتۋمەن كەلەدى»، - دەدى ق ر مادەنيەت جانە سپورت ءمينيسترى داۋرەن ابايەۆ.

«قازاق انيماتسيا» شىعارماشىلىق بىرلەستىگىنىڭ جۇمىسى باستالعالى ءۇش اي ىشىندە انيماتسيا سالاسىنداعى الەمنىڭ جەتەكشى ماماندارىنان شەبەرلىك سىنىپتارى وتكىزىلدى. وقۋ باعدارلاماسى بارىسىندا 300 دەن اسا ستۋدەنتتەر مەن جوبا قاتىسۋشىلارى شەتەلدىك جانە قازاقستاندىق مامانداردىڭ دارىستەرى مەن پراكتيكالىق ساباقتارىنا قاتىسىپ، كاسىبي تاجىريبەلەرىن شىڭدادى.

ءىس-شارا بارىسىندا مادەنيەت ءمينيسترى انيماتسيا ارداگەرلەرىن ماراپاتتادى. «ەڭبەك ارداگەرى» مەدالىن، كينورەجيسەر- مۋلتيپليكاتورلار گۇلميرا سادىقوۆا مەن گالينا دۋسەنكو جانە سۋرەتشى-مۋلتيپليكاتور ەرنست بەيسەيتوۆ الدى.

مادەنيەت مينيسترىنە «قازاق انيماتسيا» ش ب شەڭبەرىندە قۇرىلعان 20 پيلوتتىق جوبا كورسەتىلدى. سونىمەن قاتار، قازاقستاندىق مۋلتيپليكاتورلار انيماتسيا سالاسىنداعى حالىقارالىق ارىپتەستەرىمەن مەموراندۋمدارعا قول قويىلدى.

ايتا كەتەيىك، 55 جىل ىشىندە وتاندىق ەكى جۇزدەن اسا مۋلتفيلم ءتۇسىرىلىپ، وتىزدان اسا انيماتسيالىق ستۋديالار ومىرگە كەلدى. 2018-جىلى انيماتسيالىق كينوستۋديالار قاۋىمداستىعى قۇرىلىپ، ءوز كەزەگىندە بۇل قاۋىمداستىق رۋحاني-مادەني ماڭىزى بار كوپتەگەن ءىس شارالاردى اتقارىپ كەلەدى. سونىڭ ىشىندە جىل سايىن ۇيىمداستىرىلاتىن حالىقارالىق Amen فەستيۆالى.

بيىل Amen فەستيۆالىنە قاتىسۋعا ازەربايجان، گرۋزيا، يسپانيا، قازاقستان، قىتاي، تۇركيا، وزبەكستان جانە فرانسيا مۋلتيپليكاتورلارىنان بارلىعى 147 ءوتىنىم ءتۇستى، ولاردىڭ 55 ءى ىرىكتەۋدەن ءوتتى. بۇل جوبالاردى وتاندىق جانە شەتەلدىك انيماتسيانىڭ كورنەكتى قايراتكەرلەرى ەنگەن قازىلار القاسى ىرىكتەدى.

الداعى جىلى قازاق انيماتسيالىق كينو ونەرىنىڭ اتاسى امەن قايداردىڭ تۋعانىنا ءبىر عاسىر، ياعني 100 جىل تولماق. وسىعان وراي «قازاقانيماتسيا» شىعارماشىلىق بىرلەستىگىندە ۇلتتىق كينونى قولداۋ مەملەكەتتىك ورتالىعىنىڭ تاپسىرىسىمەن «امەن اعانىڭ عاجايىپ بايتەرەگى» اتتى قىسقامەتراجدى مۋلتفيلم ءتۇسىرىلدى.