قازاقستاندا ءبىر ايدىڭ ىشىندە 20 ميلليونعا جۋىق كيبەرشابۋىل جاسالعان
«ەلىمىزدە بولىپ جاتقان كيبەرشابۋىلدارعا تويتارىس بەرۋ جۇمىستارى جالعاسىپ جاتىر. بۇگىنگى تاڭدا قاۋىپتەردى ازايتۋ ءۇشىن بارلىق جەلىلىك ترافيكتى تالداۋ جانە ءاربىر پاكەتتى تەكسەرۋ جۇمىستارى جۇرگىزىلۋدە. كيبەرقالقان زياندى ترافيك پەن زياندى باعدارلامالاردى ءسۇزۋ ارقىلى ىشكى جانە سىرتقى پەريمەترلىك شابۋىلدارعا توتەپ بەرۋدە. ءبىر ايدىڭ ىشىندە 20 ميلليونعا جۋىق كيبەرشابۋىلعا تويتارىس بەرىلدى»، - دەلىنگەن ۇيىمنىڭ حابارلاماسىندا.
«مەملەكەتتىك تەحنيكالىق قىزمەتتىڭ» بولجامىنشا، ەلىمىزدىڭ قاۋىپسىزدىك جۇيەسىنە كيبەرشابۋىلداردىڭ ۇدەۋى قازاقستانداعى سايلاۋ كەزەڭىنىڭ باستالۋىمەن بايلانىستى بولۋى مۇمكىن.
DDoS شابۋىلدارى ءۇشىن بۇكىل الەم بويىنشا تارالاتىن بوتنەت دەپ اتالاتىن ۆيرۋس جۇققان كومپيۋتەرلەر مەن IoT قۇرىلعىلارىنىڭ جەلىلەرى قولدانىلعان. قازىرگى ۋاقىتتا Cybershield كۇشەيتىلگەن رەجيمدە جۇمىس ىستەيدى.
وقىرماندارعا تۇسىنىكتى بولۋ ءۇشىن ايتا كەتسەك، DDoS شابۋىلى - بۇل بەلگىلى ءبىر ينتەرنەت- رەسۋرسقا نەمەسە ينتەرنەت سەگمەنتىنە رەتسىز سۇرانىستار تۇرىندەگى ارنايى باعىتتالعان قۋاتتى ترافيك اعىنى. شابۋىل ناتيجەسىندە ينتەرنەتكە قول جەتكىزۋ قيىندايدى (ينتەرنەت قىزمەتتەرىنىڭ جۇمىسىندا كىدىرىس بولۋى مۇمكىن) نەمەسە ول مۇلدەم جۇمىسىن توقتاتادى.
ەسكە سالا كەتەيىك، قازاقپارات بۇعان دەيىن قازنەتكە بىرنەشە كۇن بويى كيبەرشابۋىل جاسالعانىن حابارلاعان بولاتىن.
سونداي- اق ق ر سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين مەملەكەتتىك اقپاراتتىق رەسۋرستارعا DDoS- شابۋىلدار تۋرالى پىكىر ءبىلدىردى.
اۆتور
زارينا تۋعانبايەۆا