شەتەلدىك مەردىگەرلەر جول جوندەۋ كەزىندە 20 ميلليارد تەڭگە جىمقىرعان
18 تامىز 12:10

شەتەلدىك مەردىگەرلەر جول جوندەۋ كەزىندە 20 ميلليارد تەڭگە جىمقىرعان

نۇر-سۇلتان. قازاقپارات - ەكى شەتەلدىك مەردىگەر مەكەمە جول جوندەيمىن دەپ ەلگە 20 ميلليارد تەڭگەدەن استام شىعىن كەلتىرگەن، دەپ حابارلايدى «حابار 24».

سىبايلاس جەمقورلىققا قارسى ءىس- قيمىل اگەنتتىگىنىڭ باسشىسى سايان احمەتجانوۆ بۇل سالاداعى پاراقورلىقتىڭ ءبىرقاتار جولىن اشكەرەلەپ ءتىزىپ بەردى. سوراقىسى سول، ەلدە قۇرىلىس ماتەريالدارىنىڭ ساپاسىن تەكسەرەتىن زەرتحانالار بولۋى كەرەك دەگەن تەمىردەي تالاپ جوق. وسىنىڭ سالدارىنان اقشانى ۇنەمدەۋ ءۇشىن تاپسىرىستى ورىنداۋشىلار ارزان ءارى ساپاسىز زاتتاردى پايدالانادى. تەحنيكالىق قاداعالاۋدىڭ اتى بار، زاتى جوق. تۇپتەپ كەلگەندە جۇمىستى قابىلداۋ اكتىسىنە تەك تاپسىرىس بەرۋشى مەن مەردىگەر مەكەمە قول قويادى ەكەن.

«ۇكىمەتتىك زايمدار - بيۋدجەت قارجىسى. تەندەر كەزىندە جۇمىستى ارزان باعامەن ىستەۋگە دايىن مەردىگەر مەكەمەگە تاڭداۋ تۇسەدى. سوڭعىسىنىڭ شوتىنا بانك كەپىلدىگى بويىنشا كەلىسىمگە سايكەس العىتولەم اۋدارىلادى. سەنىمسىز بانك ارقىلى اۋدارىلعان العىتولەمنىڭ كولەمى وسەدى. ناقتى نورماتيۆتىك شارتتاردىڭ بولماۋى كەسىرىنەن جاۋاپتى مەكەمە وزىنە جۇكتەلگەن مىندەتتى ويداعىداي ورىنداماي، كەلىسىمدى بۇزادى. ارتىنشا، مەردىگەر وتانىنا ورالادى. ال كوميتەت بۇل ءىستى اربيتراجدىق سوتتىڭ قاراۋىنا قالدىرادى. تەكسەرىس ناتيجەسىندە وسىنداي ەكى كومپانيا انىقتالدى. ولاردىڭ مەملەكەتكە كەلتىرگەن زالالى 20 ميلليارد 800 ميلليون تەڭگەگە تەڭ»، دەيدى ق ر سىبايلاس جەمقورلىققا قارسى ءىس-قيمىل اگەنتتىگى دەپارتامەنتىنىڭ پريەۆەنتسيا قىزمەتىنىڭ باسشىسى سايان احمەتجانوۆ.

جاڭالىقتار