فۋتبولدان كاتاردا وتەتىن الەم چەمپيوناتىنىڭ اشىلۋى 20 قاراشاعا وزگەردى
12 تامىز 19:11

فۋتبولدان كاتاردا وتەتىن الەم چەمپيوناتىنىڭ اشىلۋى 20 قاراشاعا وزگەردى

دوحا. قازاقپارات - كاتاردا وتەتىن فۋتبولدان الەم چەمپيوناتى جوسپارلانعان كەستەدەن ءبىر كۇن بۇرىن، ياعني 20- قاراشادا باستالادى، دەپ حابارلايدى قازاقپارات ءتىلشىسى AlJazeera سايتىنا سىلتەمە جاساپ.

«بۇل وزگەرىس فۋتبولدان الەم چەمپيوناتىنىڭ قوجايىندار نەمەسە قازىرگى چەمپيوندار قاتىساتىن ءبىرىنشى ماتچپەن اشىلۋى ءداستۇرىنىڭ ساباقتاستىعىنا مۇمكىندىك بەرەدى»، - دەلىنگەن ف ي ف ا مالىمدەمەسىندە.

دەمەك، چەمپيونات قوجايىندارى كاتار مەن ەكۆادور اراسىنداعى العاشقى ويىندى اشىلۋ سالتاناتىنان كەيىن بىردەن وتكىزەدى.

«ف ي ف ا-2022 الەم چەمپيوناتى جەرگىلىكتى جانە شەتەلدىك جانكۇيەرلەر ءۇشىن تىپتەن مەرەكەلىك سيپاتتا باستالاتىن بولدى، ويتكەنى قابىلداۋشى ەل كاتار ەندى ەكۆادورمەن جەكسەنبى، 20- قاراشا كۇنى ساعات 19:00 دە (نۇر-سۇلتان ۋاقىتىمەن 22:00) كەزدەسەدى. بيلەت يەلەرىنە ماتچتاردىڭ اۋىستىرىلعانى تۋرالى ەلەكتروندىق پوشتا ارقىلى حابارلانادى جانە ولاردىڭ بيلەتتەرى جاڭا كۇن/ۋاقىتقا قاراماستان جارامدى بولىپ قالادى. سونىمەن قاتار، ف ي ف ا وسى وزگەرىستەن تۋىندايتىن كەز كەلگەن ماسەلەلەردى شەشۋگە تىرىسادى»، - دەپ ءمالىم ەتتى ف ي ف ا.

حالىقارالىق فۋتبول فەدەراتسياسى بۇل شەشىمنىڭ «باسەكەگە قابىلەتتى جانە وپەراتسيالىق سالدارلاردى» باعالاۋدان كەيىن، مۇددەلى تاراپتارمەن، سونداي-اق قابىلداۋشى ەلمەن كەڭەسە وتىرىپ قابىلدانعانىن ايتتى.

بۇعان دەيىن چەمپيوناتتىڭ ءبىرىنشى ماتچى 21- قاراشادا سەنەگال مەن نيدەرلاند اراسىندا وتەدى دەپ جوسپارلانعان. ف ي ف ا شەشىمىنەن كەيىن بۇل ماتچ 21- قاراشا ساعات 19:00 گە اۋىستىرىلدى، ياعني كاتار مەن ەكۆادور اراسىنداعى ويىنعا بولىنگەن كەشكى ۋاقىتقا اۋىستى.

ايتا كەتەيىك، بيىل فۋتبولدان 22-الەم چەمپيوناتى 20- قاراشا مەن 18- جەلتوقسان ارالىعىندا كاتاردا وتەدى. اشىلۋ سالتاناتى مەن ءبىرىنشى ويىندى جانكۇيەرلەر كاتار استاناسى دوحانىڭ سولتۇستىگىندە ورنالاسقان ءال-حور قالاسىنداعى 60 مىڭ كورەرمەنگە ارنالعان «ءال-بايت» ستاديونىندا تاماشالايدى. چەمپيونات اراب ەلىندە العاش رەت وتكىزىلىپ وتىر. سونداي-اق، تۋرنيردىڭ 92 جىلدىق تاريحىندا تۇڭعىش رەت جىلدىڭ سوڭعى ايلارى - قاراشا مەن جەلتوقساندا وتكىزىلمەك.

تۋرنيردىڭ فينالى 18- جەلتوقساندا، كاتاردىڭ ۇلتتىق كۇنىنە بەلگىلەنگەن.

جاڭالىقتار