دەنساۋلىق ساقتاۋ نىساندارىنا 20 شابۋىل جاسالدى - د س م
بۇل تۋرالى ق ر دەنساۋلىق ساقتاۋ مينيسترلىگى قوعاممەن بايلانىس دەپارتامەنتىنىڭ ديرەكتورى اسەل ارتاكشينوۆا ءمالىم ەتتى، دەپ حابارلايدى قازاقپارات ءتىلشىسى.
«ەلدە توتەنشە جاعداي ەنگىزىلگەن ساتتەن باستاپ 2678 زارداپ شەگۋشى مەديتسينالىق كومەككە، ونىڭ ىشىندە 1815 ءى امبۋلاتوريالىق كومەككە جۇگىندى. ستاتسيونارلىق ەم العان 863 ادامنىڭ 598 ءى شىعارىلدى، 265 ەمدەۋدى جالعاستىرۋدا. 67 ناۋقاس اۋىر حالدە رەانيماتسيادا جاتىر. 500 دەن استام كۇردەلى حيرۋرگيالىق وپەراتسيا جاسالدى. باس پروكۋراتۋرا ءمالىم ەتكەن قايتىس بولعان 225 ادامنىڭ 175 ءى مەديتسينالىق ۇيىمداردا كوز جۇمدى»، - دەدى د س م وكىلى.
سونداي-اق، ول وسى كەزەڭدە دەنساۋلىق ساقتاۋ نىساندارىنا 20 شابۋىل جاسالعانىن ايتتى.
«دەنساۋلىق ساقتاۋ نىساندارىنا 20 شابۋىل جاسالدى. ونىڭ ىشىندە الماتى قالاسىندا 5 ستاتسيونارعا، 1 مەديتسينالىق-سانيتاريالىق العاشقى كومەك نىسانىنا جانە 14 ءدارىحاناعا، الماتىدا 5 مەديتسينا قىزمەتكەرىنە، شىمكەنت قالاسى مەن الماتى وبلىسىندا ءبىر-ءبىر مەديتسينا قىزمەتكەرىنە شابۋىل جاسالدى. الماتى قالاسىندا - 31، شىمكەنتتە - 7، الماتى وبلىسىندا - 5، جامبىل وبلىسىندا - 2، جالپى سانى 45 جەدەل مەديتسينالىق جاردەم اۆتوكولىگى زارداپ شەكتى. ونىڭ ىشىندە 4 اۆتوموبيل جوندەۋگە كەلمەيدى»، - دەدى اسەل ارتاكشينوۆا.
ماماننىڭ ايتۋىنشا، الماتىنىڭ ءۇش مەديتسينالىق كلينيكاسى شامامەن ءۇش تاۋلىك بويى قورشاۋدا بولعان.
«الماتى قالاسىنىڭ ءۇش مەديتسينالىق كلينيكاسى - 1,7 جانە 12 قالالىق اۋرۋحانالار شامامەن ءۇش تاۋلىك بويى تەرروريستەرمەن قورشاۋ جاعدايىندا بولدى، بۇل رەتتە قىزمەتكەرلەر بۇل كەزەڭدە اۋىسىمسىز، بىرنەشە تاۋلىك بويى جۇمىس ىستەدى. ناۋقاستار ءۇشىن ازىق-تۇلىك جەتكىزىلمەدى، دارىگەرلەر پاتسيەنتتەرگە تاماق دايىندادى. كەيبىر زارداپ شەككەندەر دارىگەرلەردىڭ سۇراقتارىنا تۇسىنبەگەن جانە مەملەكەتتىك جانە ورىس تىلدەرىندە جاۋاپ بەرمەگەن، مەديتسينالىق كومەك العاننان كەيىن مەديتسينالىق ۇيىمداردان رۇقساتسىز كەتىپ، ءتىپتى بەلگىسىز قارۋلى ادامداردىڭ سۇيەمەلدەۋىمەن رەانيماتسيادان شىققان جاعدايلار بولدى. قازىرگى ۋاقىتتا رەسپۋبليكانىڭ بارلىق مەديتسينالىق ۇيىمدارى، ونىڭ ىشىندە الماتى قالاسى بويىنشا دا شتاتتىق رەجيمدە جۇمىس ىستەيدى»، - دەپ تۇيىندەدى د س م وكىلى.