پرەزيدەنت شەشىمى الماتى بيۋدجەتىنىڭ كىرىسىن 20 پايىزعا ارتتىردى
ورتالىق كوممۋنيكاتسيالار قىزمەتىندە وتكەن بريفينگىدە الماتى قالاسىنىڭ اكىمىنە باقىتجان ساعىنتايەۆقا پاندەميانىڭ ەكونوميكالىق سالدارىن جويۋ باعىتىنداعى جۇمىستار تۋرالى ساۋال قويىلدى. «ەڭ ۇلكەن كومەك پرەزيدەنتىمىزدىڭ قابىلداعان شاعىن جانە ورتا كاسىپكەرلىكتەن تۇسەتىن كوروپاراتيۆتىك سالىقتى جەرگىلىكتى قازىنادا قالدىرۋ تۋرالى شەشىمى بولدى. سونىڭ ءوزى عانا جالپى ەكونوميكامىزدىڭ تۇسىمىنە 20 پروتسەنت ءوسىم بەردى. الماتى شاعىن جانە ورتا بيزنەستىڭ قالاسى بولعاندىقتان، نەعۇرلىم وسى سالادان سالىق كوپ تۇسسە، جەرگىلىكتى بيلىك سوعۇرلىم كاسىپكەرلىكتى دامىتۋعا مۇددەلى. ويتكەنى سالىقتىڭ ءبارى وزىندە قالىپ وتىر»، - دەدى اكىم. ونىڭ سوزىنشە، اتالعان شەشىمنىڭ ارقاسىندا بىلتىر الماتى قالاسىنىڭ بيۋدجەتىنە تۇسكەن كىرىستىڭ كولەمى ءبىرىنشى رەت 1 تريلليون تەڭگەلىك كورسەتكىشكە جەتكەن.
«ال بيىل 10 ايدىڭ قورىتىندىسى بويىنشا ءبىزدىڭ ەكونوميكالىق ءوسىمىمىز 5,5 پايىزعا ارتىپ وتىر. قالانىڭ 2050 -جىلعا دەيىنگى دامۋ ستراتەگياسى بويىنشا الەمدەگى باسەكەگە قابىلەتتى 100 قالانىڭ ساناتىنا كىرۋ ءۇشىن جىل سايىنعى ەكونوميكالىق ءوسىم 5 پايىزدان كەم بولماۋى كەرەك. بيىل ول 5,5 پايىز بولدى»، - دەدى باقىتجان ساعىنتايەۆ.
اۆتور: ەسىمجان ناقتىباي