رەسەيدە 20 جىل بۇرىن بويجەتكەندى ولتىرگەن ەر ادام پاۆلوداردان ۇستالدى

پاۆلودار. قازاقپارات - پاۆلوداردا 20 جىل بۇرىن ر ف پەرم قالاسىندا بويجەتكەندى ولتىرگەن 46 جاستاعى قىلمىسكەر ۇستالدى.

ول ءوزىنىڭ تەگىندەگى ءبىر ءارىپتى وزگەرتىپ، قاشىپ جۇرگەن، دەپ حابارلايدى قازاقپارات ءتىلشىسى.

«پوليتسەيلەر پاۆلودار قالاسىندا 46 جاستاعى قىلمىسكەردى ۇستادى. ول رەسەي فەدەراتسياسى پەرم قالاسىندا ادام ءولتىردى دەپ ايىپتالعان. بەلگىلى بولعانداي، 2001-جىلى ەر ادام بويجەتكەندى ءولتىرىپ، قىلمىس جاساعاننان كەيىن پاۆلودار قالاسىنا كەلگەن. قىلمىسكەر ايلاكەر جانە قۋ بولىپ شىقتى: ونىڭ تەگىندەگى ءبىر ءارىپتى ادەيى وزگەرتىپ العانى انىقتالدى»، - دەدى پاۆلودار وبلىستىق پوليتسيا دەپارتامەنتى باستىعىنىڭ ورىنباسارى ەلدار ابدىكەنوۆ.

25- قىركۇيەكتەن 1- قازانعا دەيىنگى ارالىقتا پاۆلودار وبلىسىندا پوليتسيا قازاقستاننان تىس جەرلەردە جاسىرىنىپ جۇرگەن قىلمىسكەرلەردى ىزدەۋدىڭ تيىمدىلىگىن ارتتىرۋ بويىنشا «ىزدەۋ» وپەراتسياسىن جۇرگىزۋدە، دەپ اتاپ ءوتتى پاۆلودار وبلىستىق پوليتسيا دەپارتامەنتىنەن.

«پاۆلودار وبلىستىق جەدەل قىزمەتكەرلەرى اۋىر قىلمىس جاساعانى ءۇشىن ىزدەۋ سالىنعان 5 قىلمىسكەردى ۇستادى. بۇرىن ءىز-ءتۇزسىز جوعالىپ كەتكەن ەكى ازاماتتىڭ قايدا ەكەنى انىقتالدى»، - دەدى ە. ابدىكەنوۆ.

ءتارتىپ ساقشىلارى 19 جىل بويى ءوز ەلىندە جازاسىن وتەۋدەن قاشىپ جۇرگەن 52 جاستاعى قىرعىزستان ازاماتىنىڭ مەكەنجايىن انىقتادى.

«قاراعاندى وبلىسىنداعى ارىپتەستەرمەن بىرگە جەزقازعان قالاسىندا 25 جاستاعى پاۆلودارلىقتى ۇستادىق. ول پاۆلوداردا ۇرلىق جاساعانى ءۇشىن كۇدىككە ىلىنگەن. ول جەزقازعانداعى ۋاقىتشا ۇستاۋ وقشاۋلاعىشىنا قامالدى»، - دەپ حابارلادى دەپارتامەنتتىڭ باسپا ءسوز قىزمەتىنەن.

پاۆلودار وبلىسىنىڭ پوليتسەيلەرى جىل باسىنان بەرى سوت پەن تەرگەۋدەن قاشىپ جۇرگەن 74 قىلمىسكەردى ۇستادى، دەدى ۆەدومستۆودان.