جەتىسۋلىق ەرىكتىلەر ماڭعىستاۋ وبلىسىنا 20 تونناعا جۋىق ءشوپ جونەلتتى

نۇر- سۇلتان.قازاقپارات - بۇعان دەيىن تۇركىستان وبلىسىنىڭ جاستارى باستاما كوتەرىپ، قۋاڭشىلىق زاردابىن تارتىپ وتىرعان باتىس وڭىرىنە مال ازىعىن جيناپ جىبەرگەن بولاتىن، دەپ حابارلايدى «حابار 24».

وڭتۇستىك جۇرتشىلىعى ماڭعىستاۋ وبلىسىنا 80 ۆاگونداي ءشوپ جونەلتكەن. بۇل قايىرىمدىلىق شاراسى بۇگىندە رەسپۋبليكا كولەمىندە جالعاسىن تاپتى. كومەك قولىن سوزعانداردىڭ اراسىندا ايماقتاعى «شوپان اتا» شارۋا قوجالىعى دا بار. جاقىن كۇندەرى الماتى وبلىسىنان تاعى مال ازىعى تيەلگەن 5 ۆاگون جولعا شىعادى.

مۇراتبەك سۇلتانباي، ۆولونتەر:

- نۇربولات دەگەن شارۋا قوجالىعى اعامىز وسى ماڭعىستاۋ وبلىسىنا ءشوپ جىبەرەتىنىمىزدى ەستىپ، ءوزى بىزگە حابارلاستى، ءبىر ۆاگون ءشوپتى تەگىن بەرىپ، قازىر باتىسقا جونەلتەيىك دەپ جاتىرمىز. بۇل ءبىرىنشى ۆاگون عانا. ءالى دە جوسپارىمىز بويىنشا 5 ۆاگونىمىز دايىن تۇر 100 شاقتى ۆاگون جىبەرۋ جوسپارىمىز بار.

نۇربولات حالىق ۇلى، شارۋا قوجالىعىنىڭ يەسى:

- ءبىز ەندى باتىستا وسى ينتەرنەتتەن ۇلكەن اپات بولىپ جاتقانىن ەستىپ، 4 تۇلىك مالدىڭ قىرىلىپ جاتقان جاعدايىن ەستىپ ءبىلىپ، قۇرمەت باۋىرىمىزدىڭ كومەك كورسەتىپ جاتقانىن ەستىپ، ءوزىمىز قولىمىزدا مالعا جيناپ وتىرعان ءشوبىمىزدى باتىسقا اتاۋدى ءجون كورىپ، مىنە، بۇگىن الماتى وبلىسى جەتىگەننەن ءبىر فۋرا ءشوپتى باسىپ بەرىپ وتىرمىز. ءوز قولىمىزدان كەلگەن كومەگىمىزدى كورسەتىپ وتىرمىز.

www.24.kz