ۇكىمەت مۇناي باعاسىن جىل سوڭىنا دەيىن باررەلىنە 20 دوللار دەڭگەيىندە انىقتادى

نۇر-سۇلتان. قازاقپارات - بيىل ەلىمىزدىڭ جالپى ىشكى ءونىمى 4,8 تريلليون تەڭگەگە تومەن بولادى.

بۇل تۋرالى ۇكىمەت وتىرىسىندا ۇلتتىق ەكونوميكا ءمينيسترى رۋسلان دالەنوۆ ايتتى، دەپ حابارلايدى قازاقپارات ءتىلشىسى.

«سىزدەردىڭ قاراۋلارىڭىزعا 2020-جىلعا ارنالعان ماكروەكونوميكالىق كورسەتكىشتەر مەن بيۋجەت پارامەترلەرى بولجامىن ناقتىلاۋ، سونداي-اق «ۇلتتىق قوردان 2020-2022-جىلدارعا ارنالعان كەپىلدەندىرىلگەن ترانسفەرت تۋرالى» زاڭعا وزگەرىس ەنگىزۋ تۋرالى» پرەزيدەنت جارلىعىنىڭ جوباسى ەنگىزىلىپ وتىر. بولجامدى ناقتىلاۋدىڭ نەگىزگى فاكتورلارى - تۇراقسىز سىرتقى ەكونوميكالىق جاعداي، بايقالىپ وتىرعان جاھاندىق رەتسەسسيا جانە كوروناۆيرۋستىڭ تارالماۋى بويىنشا قورعاۋ شارالارى اياسىندا ىسكەرلىك بەلسەندىلىكتىڭ باياۋلاۋى»، - دەدى مينيستر.

ونىڭ دەرەگىنشە، جىل باسىنان بەرى مۇناي باعاسى - 66، مەتالدار - 16، الەمدىك بيرجالىق يندەكستەر ورتاشا ەسەپپەن 21 پايىزعا تومەندەدى. بيىلعى 1- ساۋىردەگى جاعداي بويىنشا مۇناي باعاسى ءبىر باررەلىنە 22 دوللارعا دەيىن تومەندەدى.

«وسىنى ەسكەرە وتىرىپ، وسى جىلعى ءساۋىر-جەلتوقسانعا مۇنايدىڭ ورتاشا باعاسى ءبىر باررەلىنە 20 دوللار دەڭگەيىندە انىقتالدى. دوللاردىڭ ەسەپتىك باعامى 440 تەڭگە دەڭگەيىندە جانە جىلدىق ينفلياتسيا 9-11 پايىز ارالىعىندا ەسەپكە الىندى. باعانىڭ تومەندەۋى اياسىندا مۇناي ءوندىرۋ بويىنشا بولجام 86 ميلليون تونناعا دەيىن ازايتىلدى. بۇل تاۋ-كەن ونەركاسىبى ءوندىرىسىنىڭ تومەندەۋىنە اكەلەدى. سونىمەن قاتار، وڭدەۋ ونەركاسىبىندە، اۋىل شارۋاشىلىعىندا، قۇرىلىستا جانە كورسەتىلەتىن قىزمەتتەر سەكتورىندا، ونىڭ ىشىندە ساۋدادا بۇعان دەيىن ماقۇلدانعان ءوسۋ قارقىندارىمەن سالىستىرعاندا تومەندەۋ كۇتىلۋدە»، - دەدى ول.

ءمينيستردىڭ ايتۋىنشا، ەكسپورت 16,3 ميلليارد دوللارعا تومەندەپ، 35,1 ميلليارد دوللاردى قۇرايدى.

يمپورت 7,5 ميلليارد دوللارعا تومەندەپ، 26,6 ميلليارد دوللار بولادى.

«جوعارىدا اتالعان فاكتورلاردى ەسكەرە وتىرىپ، جالپى ىشكى ءونىمنىڭ 0,9 پايىزعا تومەندەۋى كۇتىلۋدە. نومينالدى جالپى ىشكى ءونىم 69,7 تريلليون تەڭگە كولەمىندە باعالانۋدا. بۇل ماقۇلدانعان بولجامنان 4,8 تريلليون تەڭگەگە تومەن»، - دەدى رۋسلان دالەنوۆ.