ۇلتتىق سپورتتىڭ 20 دان استام تۇرىنە ەرەكشە كوڭىل ءبولىندى - اقتوتى رايىمقۇلوۆا

نۇر-سۇلتان. قازاقپارات - پارلامەنت ماجىلىسىندە ق ر مادەنيەت جانە سپورت ءمينيسترى اقتوتى رايىمقۇلوۆا ۇلتتىق سپورتتى دامىتۋ جاعدايىن باياندادى، دەپ حابارلايدى قازاقپارات ءتىلشىسى.

«تاۋەلسىزدىك جىلدارىندا ۇلتتىق سپورتتىڭ 20 دان استام ءتۇرى بەلسەندى دامىدى. 2019-جىلدىڭ قورىتىندىسى بويىنشا ۇلتتىق سپورت تۇرلەرىمەن 399 مىڭنان استام ادام اينالىستى. بۇگىنگى تاڭدا قازاقستاندا ۇلتتىق سپورت تۇرلەرى بويىنشا 8 مامانداندىرىلعان كلۋب جانە 13 مامانداندىرىلعان سپورت مەكتەبى بار»، - دەدى ا. رايىمقۇلوۆا پارلامەنت ماجىلىسىندەگى ۇكىمەت ساعاتىندا.

سونىمەن قاتار مينيستر «قازاقستان بارىسى» جوباسى ءبىزدىڭ ۇلتتىق سپورتىمىزدىڭ برەندىنە اينالعانىن، «ەۋرازيا بارىسى» مەن «الەم بارىسى» تۋرنيرلەرىن ۇيىمداستىرۋ ارقىلى حالىقارالىق دەڭگەيگە شىعۋ مۇمكىن بولعانىن اتاپ ءوتتى.

تاراتىلعان مالىمەتكە قاراعاندا، 2021-جىلى نۇر-سۇلتان قالاسىندا 1- الەمدىك ەتنوسپورت ويىندارىن وتكىزۋ باستاماسى قاراستىرىلۋدا. بۇل ويىنداردا 15 سپورت ءتۇرى بويىنشا جارىس وتكىزۋ جوسپارلانعان.

بۇدان بۇرىن حابارلانعانداي، 2019-جىلدىڭ قورىتىندىسى بويىنشا ەلىمىزدە دەنە شىنىقتىرۋ جانە سپورتپەن جۇيەلى تۇردە شۇعىلداناتىندار سانى 5,7 ميلليون ادامعا جەتكەن. بۇل جالپى حالىقتىڭ 30,6 پايىزى.