قازاقستان بايقوڭىرداعى قالدىقتاردى جويۋ ءۇشىن رەسەيگە 20 ميلليارد تەڭگە تولەمەيدى - مينيسترلىك

None
None
نۇر-سۇلتان. قازاقپارات - ق ر سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى قازاقستان بايقوڭىرداعى راديواكتيۆتى قالدىقتاردى جويۋ ءۇشىن رەسەيگە 20 ميلليارد تەڭگە تولەيتىنى تۋرالى اقپاراتتى تەرىسكە شىعاردى، دەپ حابارلايدى قازاقپارات.

«جەلىدە بايقوڭىر عارىش ايلاعىنىڭ اۋماعىنداعى ۋلى جانە راديواكتيۆتى قالدىقتاردى جويۋ ءۇشىن قازاقستان رەسەيگە 20 ميلليارد تەڭگە تولەيتىنى تۋرالى اقپارات تاراۋدا. اتالعان فاكتىلەر شىندىققا جاناسپايدى. قازاقستان بايقوڭىر عارىش ايلاعىنداعى قالدىقتاردى جويۋعا 20 ميلليارد تەڭگە ءبولۋدى جوسپارلاعان جوق جانە ونى تولەمەيدى. بۇل ماسەلە بويىنشا قانداي دا ءبىر تولەمدەر تۋرالى قازاقستان مەن رەسەي اراسىندا ەشبىر شەشىمدەر مەن كەلىسىم جاسالعان ەمەس جانە تالقىلانىپ جاتقان جوق»، - دەلىنگەن مينيسترلىكتىڭ Facebook-تەگى پاراقشاسىندا.

ۆەدومستۆو ءمالىم ەتكەندەي، تاراتىلىپ جاتقان اقپاراتتا كورسەتىلگەن كارەرلەردە بايقوڭىر اۋماعىنداعى توزىعى جەتكەن عيماراتتاردى سۇرگەننەن كەيىن قالاتىن قۇرىلىس قالدىقتارى (كىرپىش سىنىقتارى، قايتا وڭدەۋدەن كەيىنگى بەتون) عانا ورنالاستىرىلاتىن بولادى. «بۇل كارەرلەردى جاساقتاۋ جۇمىستارىن تولىعىمەن رەسەيلىك تاراپ جۇرگىزدى. الدىن الا دەرەكتەر بويىنشا، وعان جالپى سوماسى 20 ميلليون رۋبل جۇمسالعان. جوبالار قىزىلوردا وبلىسى بويىنشا ەكولوگيا دەپارتامەنتىنىڭ وڭ قورىتىندىسىن الدى. توزىعى جەتكەن عيماراتتاردى بۇزۋ جانە پوليگونعا قۇرىلىس قالدىقتارىن جەتكىزۋ جۇمىستارىن قازاقستاندىق «ينفراكوس» كومپانياسى جۇرگىزۋدە.

بارلىق عيماراتتار مەن قۇرىلىس قالدىقتارىن رادياتسيالىق قاۋىپسىزدىككە تەكسەرۋدى قازاقستاندىق جانە رەسەيلىك مامانداندىرىلعان كومپانيالار 3 رەت جۇرگىزەدى: سۇرۋگە دەيىن، اياقتالعاننان كەيىن، سونداي-اق پوليگوندا.

اتالعان كارەرلەردە ۋلى جانە راديواكتيۆتى قالدىقتاردى، سونىمەن قاتار مەتال سىنىقتارىن ورنالاستىرۋ قاراستىرىلماعان جانە ول قازاقستان رەسپۋبليكاسىنىڭ زاڭدارىنا قايشى كەلەدى»، - دەدى مينيسترلىكتەن.

اتاپ وتىلگەندەي، قىزىلوردا وبلىسى بويىنشا ەكولوگيا دەپارتامەنتىنىڭ ماماندارى بايقوڭىر عارىش ايلاعىنداعى بارلىق نىساندارعا كەز كەلگەن ۋاقىتتا بارا الادى جانە رەسەيلىك، قازاقستاندىق كومپانيالارعا جوسپارلى تەكسەرىس جۇرگىزىپ تۇرادى.

«بەلسەندى ازاماتتىق ۇستانىمدارىڭىز ءۇشىن العىس بىلدىرەمىز. ءبىراق الداعى ۋاقىتتا تەكسەرىلگەن جانە شىنايى اقپاراتتارعا عانا سۇيەنۋدى سۇرايمىز»، - دەدى ق ر سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنەن.

سوڭعى جاڭالىقتار