ەلوردادا الەمنىڭ 20 ەلىنەن كەلگەن قانداستار باس قوستى

نۇر-سۇلتان. قازاقپارات - ەلوردادا دۇنيە ءجۇزىنىڭ تۇكپىر-تۇكپىرىنەن كەلگەن قانداستاردىڭ قاتىسۋىمەن «وتانداستار. بولاشاققا باعدار» اتتى حالىقارالىق دوڭگەلەك ۇستەل ءوتىپ جاتىر، دەپ حابارلايدى قازاقپارات ءتىلشىسى.

ءىس-شارا «وتانداستار قورى» كەاق جانە «دۇنيەجۇزى قازاقتارىنىڭ قاۋىمداستىعى» ر ق ب ۇيىمداستىرۋىمەن شەت ەلدەردەگى قازاق دياسپوراسىنىڭ تاريحي وتانىمەن مادەني- گۋمانيتارلىق جانە ىسكەرلىك ىنتىماقتاستىعىن ودان ءارى دامىتۋ ماقساتىن كوزدەيدى. جيىنعا قر مەملەكەتتىك حاتشىسى قىرىمبەك كوشەربايەۆ، ق ر پرەمەر- ءمينيسترىنىڭ ورىنباسارى بەردىبەك ساپاربايەۆ، ق ر اقپارات جانە قوعامدىق دامۋ ءمينيسترى داۋرەن ابايەۆ، «وتانداستار قورى» ك ە ا ق پرەزيدەنتى نۇرتاي ابىقايەۆ قاتىسۋدا.

شارا اياسىندا دۇنيەجۇزى قازاقتارىنىڭ قاۋىمداستىعى مەن قور وكىلدەرى قىزمەتتەرىنىڭ نەگىزگى باعىتتارى، ونىڭ ىشىندە شەت ەلدەردەگى قانداستارمەن مادەني- گۋمانيتارلىق جانە ىسكەرلىك بايلانىستى كەڭەيتۋ تەتىكتەرى تالقىلانباق. وسى ماقساتتى كوزدەگەن «وتانداستار» قورىنىڭ نەگىزگى جوبالارىنىڭ ءبىرى «قازاق ءۇيى» قازاق مادەني- ىسكەرلىك ءۇيىنىڭ قۇرامىنا كىرەتىن ىسكەرلىك ۇيلەرى مەن مادەني ورتالىقتارىنىڭ الەم بويىنشا جەلىسىن قۇرۋ جوسپارى تالقىلانادى. بىرلەسكەن جۇمىستىڭ ناقتى ۇسىنىستارى ازىرلەنەدى. قاتىسۋشىلارعا قازاقستاننىڭ ينۆەستيتسيالىق الەۋەتى مەن وڭىرلەردە بيزنەستى دامىتۋ ءۇشىن جاسالعان جاعدايلار جايىندا اقپارات بەرىلەدى. «اتامەكەن» ىسكەرلىك ءۇيىنىڭ پانەلدىك سەسسياسىندا ىسكەرلىك ءۇيىنىڭ ماقساتى مەن مىندەتى، وتانداستاردى كونسۋلتاتسيالىق قولداۋ ورتالىعىنىڭ جۇمىسى جايلى ايتىلادى. شەت ەلدەردە وتكىزىلگەن بيزنەس فورۋمدار قورىتىندىلانادى. تۇركيا، شۆەتسيا، ەۋروپا ەلدەرىنەن كەلگەن قانداس كاسىپكەرلەر ءسوز سويلەپ، «قازاگرو»، «بايتەرەك» حولدينگتەرى مەن «قازاقينۆەست» ۇ ا ق ءوز تاراپتارىنان قانداس كاسىپكەرلەردى قولداۋ مۇمكىندىكتەرىمەن بولىسەدى.

شەت ەلدەردەگى قازاق ءتىلدى ب ا ق وكىلدەرىنىڭ قاتىسۋىمەن وتەتىن پانەلدىك سەسسيادا شەت ەلدەردەگى قازاق ءتىلدى ب ا ق پەن جۋرناليستەردىڭ ءوزارا ىنتىماقتاستىق ماسەلەسى تالقىلانادى.

«اباي» مادەني ورتالىعىنىڭ پانەلدىك سەسسياسىندا مادەني ورتالىقتىڭ ماقساتى مەن مىندەتى، شەت ەلدەردە قازاق مادەنيەتى مەن ونەرىن دامىتۋ، ءبىلىم بەرۋ جوبالارىن ىسكە اسىرۋ، ەلىمىزدە تۋريستىك كلاستەردى دامىتۋ جانە ەلىمىزدىڭ تۋريستىك تارتىمدىلىعىن ارتتىرۋ، بارلىق ەلدە قازاق ادەبيەتى ورتالىعىنىڭ جەلىسىن قۇرۋ ماسەلەلەرى تالقىلانادى.

«وتانداستار» قورىنىڭ جوباسى - «الەمدەگى تانىمال قازاقتار تۋرالى» كىتابى مەن «مۇزبالاق» انيماتسيالىق فيلمى تانىستىرىلادى. «جاس قازاق» جاستار كلۋبىنىڭ پانەلدىك سەسسياسىندا شەت ەلدەردەگى قازاق جاستارىن تاريحي وتانىن اينالاسىنا شوعىرلاندىرۋ جانە ولارعا جان-جاقتى قولداۋ كورسەتۋ، دياسپورالىق جانە جاستار ساياساتى سالاسىنداعى ءوزارا ارەكەتتەستىك جانە سەرىكتەستىك اياسىن كەڭەيتۋ، جاس بەلسەندىلەردى تانىستىرۋ، دوستىعىن نىعايتۋ، ولاردىڭ بويىندا تاريحي وتانىنا دەگەن پاتريوتتىق سەزىمدەرىن قالىپتاستىرۋ، قازاقستان رەسپۋبليكاسىنىڭ بارلىق جاستار ۇيىمدارىنىڭ ءىس-شارالارىنا دياسپورا وكىلدەرىن قاتىستىرۋ، ءوزارا بىرىككەن جۇمىس جوسپارىن قۇرىپ، بىرلەسە جۇمىس ىستەۋ ماسەلەسى تالقىلانادى. «قازاق ەلى» جاستار كلۋبى جۇمىسىنىڭ جوسپارى بەكىتىلەدى.

جيىنعا 20 ەلدەگى قازاق دياسپورالارىنان 150 دەلەگات قاتىسىپ وتىر.

اۆتور: ايان بەكەن ۇلى