قازاقپارات كۇنتىزبەسى: 20- قاراشا
دۇنيەجۇزىلىك بالالار كۇنى
1954-جىلى ب ۇ ۇ- نىڭ باس اسسامبلەياسى «دۇنيەجۇزىلىك بالالار كۇنىن» بارلىق ەلدەردە مەرەكەلەۋدى ۇسىندى. 1959-جىلى وسى كۇنى بالالار قۇقىعى دەكلاراتسياسى، ال 1989-جىلى بالالار قۇقىعى كونۆەنتسياسى قابىلداندى.
دۇنيەجۇزىلىك سوزىلمالى وكپە اۋرۋىنا قارسى كۇرەس كۇنى
دۇنيەجۇزىلىك دەنساۋلىق ساقتاۋ ۇيىمىنىڭ (د د س ۇ) باستاماسى بويىنشا جىل سايىن قاراشانىڭ ەكىنشى نەمەسە ءۇشىنشى سارسەنبىسىندە اتالىپ وتىلەدى. دۇنيەجۇزىلىك سوزىلمالى وبسترۋكتيۆتى وكپە اۋرۋلارى كۇنىنە وراي، اتالعان اۋرۋ تۋرالى حاباردارلىقتى ارتتىرۋ جانە ناۋقاستارعا كۇتىمدى جاقسارتۋ بويىنشا جاھاندىق شارالار قابىلدانۋدا.
گەوگرافيالىق اقپاراتتىق جۇيەلەر كۇنى
1999-جىلدان بەرى ءبىرقاتار امەريكاندىق كومپانيالار مەن ۇيىمداردىڭ (ۇلتتىق گەوگرافيالىق قوعام، USGS، Sun Microsystems, Hewlett-Packard, ESRI) باستاماسىمەن جىل سايىن قاراشا ايىنىڭ ءۇشىنشى سارسەنبىسىندە اتاپ وتىلەدى.
گەوگرافيالىق اقپاراتتىق جۇيە (گ ا ج) بەلگىلى ءبىر جەردىڭ كەڭىستىگى (گەوگرافيالىق) مالىمەتتەرى مەن ولارمەن بايلانىستى اقپاراتتى جيناۋ، ساقتاۋ، تالداۋ جانە گرافيكالىق ۆيزۋاليزاتسيالاۋ جۇيەسى. بۇل مالىمەتتەر كارتوگرافيا، گەولوگيا، مەتەورولوگيا، جەرگە ورنالاستىرۋ، ەكولوگيا، مۋنيتسيپالدىق باسقارۋ، كولىك، ەكونوميكا، قورعانىس جانە ت. ب. كوپتەگەن سالالاردا قولدانىلادى.
پەدياتر كۇنى
پەدياتر كۇنى 1954-جىلدان بەرى دۇنيەجۇزىلىك بالالار كۇنىمەن بىرگە مەرەكەلەنىپ كەلەدى. 1954-جىلى ب ۇ ۇ باس اسسامبلەياسى بارلىق مۇشە ەلدەرگە بەيبىت باۋىرلاستىق كۇنى رەتىندە، سونداي-اق بۇكىل الەمدەگى بالالاردىڭ ەسەن-ساۋلىعى مەن ولاردىڭ ءوزارا تۇسىنىستىگىن قامتاماسىز ەتۋ ءۇشىن دۇنيەجۇزىلىك بالالار كۇنىن مەرەكەلەۋدى ەنگىزۋدى ۇسىندى.
ب ۇ ۇ مۇشە ەلدەردىڭ ۇكىمەتتەرىنە بۇل كۇندى ءوز قالاۋلارى بويىنشا كەز كەلگەن داتادا اتاپ ءوتۋدى ۇسىندى. ال، 1959-جىلدىڭ 20- قاراشاسى كۇنى اسسامبلەيا بالا قۇقىقتارى جونىندەگى دەكلاراتسيانى جانە 1989-جىلى ءدال وسى كۇنى بالالار قۇقىقتارى تۋرالى كونۆەنتسيانى قابىلدادى.
ەستە قالار وقيعالار
1923-جىلى «سوۆەتسكايا ستەپ» گازەتى جارىققا شىقتى. گازەت كۇن سايىن شىعىپ تۇراتىن. باس رەداكتورى ل. حەيفەتس بولدى. قازاق ولكەلىك كوميتەتىنىڭ قاۋلىسىمەن 1932-جىلى اتاۋى «كازاحستانسكايا پراۆدا» بولىپ وزگەرتىلدى. وسى اتاۋمەن گازەتتىڭ العاشقى سانى 21- قاڭتاردا جارىق كوردى.
1998-جىلى بايقوڭىر عارىش ايلاعىنان حالىقارالىق عارىش ستانساسىنىڭ العاشقى ءمودۋلى ۇشىرىلدى.
2009-جىلى ەلباسى نۇرسۇلتان نازاربايەۆ «استانا-بۋراباي» اۆتوماگيسترال قۇرىلىسىنىڭ اياقتالۋىنا بايلانىستى سالتاناتتى راسىمگە قاتىستى. ۇزىندىعى 224 شاقىرىم بولاتىن ەلىمىزدەگى العاشقى ۇلكەن جىلدامدىقتى استانا-بۋراباي اۆتوماگيسترالىنىڭ قۇرىلىسى 2006-جىلى باستالعان بولاتىن. التى جولاقتى جاڭا جول تەحنيكالىق ساناتى 1-ا پارامەترلەرىنە سايكەس كەلەدى. جولدىڭ ەسەپتى جىلدامدىعى ساعاتىنا 150 شاقىرىمدى قۇرايدى. نىسانداعى جۇمىستارعا 1,4 مىڭ دانا تەحنيكا جانە 3,5 مىڭ ادام جۇمىلدىرىلدى.
2012-جىلى قاراعاندىدا ۋكراينا قۇرمەتتى كونسۋلدىعى اشىلدى. وسىعان وراي ۇيىمداستىرىلعان شارادا كونسۋلدىق فۋنكسيالاردى ورىنداۋ تۋرالى شارتقا قول قويىلىپ، كونسۋلدىق پاتەنت جانە ەكزەكۆاتۋرا-قابىلداۋشى مەملەكەتتىڭ ۇكىمەتى كونسۋلدى مويىندايتىنىن كۋالاندىراتىن رەسمي قۇجات تابىس ەتىلدى.
2012-جىلى استاناداعى ك. بايسەيىتوۆا اتىنداعى ۇلتتىق وپەرا جانە بالەت تەاترىنىڭ كونتسەرت زالىندا ت م د جانە تۇركىتىلدەس ەلدەرى كومپوزيتورلارىنىڭ حالىقارالىق «Camerata tempo» كامەرالىق مۋزىكا فەستيۆالى اشىلدى. فەستيۆالگە قازاقستان، رەسەي، ازەربايجان، وزبەكستان، قىرعىزستان، تاجىكستان، ا ق ش، بەلگيا، گرۋزيا، تۇركيا، ۇلى بريتانيا، فرانسيا ەلدەرىنىڭ وركەسترلەرى قاتىستى.
2012-جىلى قازاقستاندا «سپورتتىق جەكپە-جەك جانە كۇش قولدانىلاتىن سپورت تۇرلەرى كونفەدەراتسياسى» قۇرىلدى.
2013-جىلى لوندوندا قازاقستان ەلشىلىگىنىڭ جاڭا عيماراتى اشىلدى.
2014-جىلى ق ر ۇلتتىق مۋزەيىندە قازاق ارحەولوگيا مەكتەبىنىڭ نەگىزىن قالاۋشىلاردىڭ ءبىرى، بەلگىلى عالىم كەمەل اقىشيەۆكە ارنالعان «ۇلى دالانىڭ كەمەڭگەر عالىمى» كورمەسى اشىلدى. عالىمنىڭ اتاعى ەسىك قورعانىن اشۋ ارقىلى كەڭگە جايىلدى. قورعاننان تابىلعان «التىن ادام» تاۋەلسىز قازاقستاننىڭ سيمۆولدارىنىڭ بىرىنە اينالدى.
2014-جىلى قازاقستان رەسپۋبليكاسى سان-تومە جانە پرينسيپي دەموكراتيالىق رەسپۋبليكاسىمەن ديپلوماتيالىق قاتىناستار ورناتتى. بىرلەسكەن كومميۋنيكەگە قازاقستان مەن سان- تومە جانە پرينسيپيدىڭ ب ۇ ۇ جانىنداعى تۇراقتى وكىلدەرى - قايرات ءابدىراحمانوۆ جانە كارلوس فيلومەنو اگوستينو داس نيەۆەس قول قويدى.
سان-تومە جانە پرينسيپي - باتىس افريكادا ورنالاسقان ارال مەملەكەت. حالقى 200 مىڭنان استام. جوعارعى زاڭ شىعارۋشى ورگانى - ءبىر پالاتالى ۇلتتىق جينالىس. باسقارۋ فورماسى - پرەزيدەنتتىك رەسپۋبليكا.
2017-جىلى قازاقستان رەسپۋبليكاسى ەكونوميكالىق ىنتىماقتاستىق جانە دامۋ ۇيىمىنىڭ ءبىلىم ساياساتى كوميتەتىنىڭ قاتىسۋشىسى بولۋعا شاقىرتۋ الدى. بۇل - ءبىلىم بەرۋ مەن ەكونوميكاداعى الدىڭعى قاتارلى كورسەتكىشتەرگە قول جەتكىزىپ وتىرعان ەل رەتىندە قازاقستانعا دەگەن جوعارى سەنىمنىڭ، مەيلىنشە تىعىز ىنتىماقتاستىققا ۇمتىلۋدىڭ بەلگىسى.
2018-جىلى قازاقستاندىق ءانشى دانەليا تۋلەشوۆا كىشى «ەۆروۆيدەنيە» ءان بايقاۋىنا قاتىسۋشىلارمەن بىرگە بەلارۋس رەسپۋبليكاسىنىڭ پرەزيدەنتى الەكساندر لۋكاشەنكونىڭ قابىلداۋىندا بولىپ، وعان كادەسىي - ءۇيدى ءتىل-كوزدەن ساقتايتىن تۇمار سىيلادى.