بيىل ەلىمىزدە 20 مىڭ تۇراقتى جۇمىس ورنى اشىلادى
بۇل تۋرالى بۇگىن ۇكىمەت وتىرىسىندا ق ر 2015-2019-جىلدارعا ارنالعان يندۋستريالدى-يننوۆاتسيالىق دامۋ مەملەكەتتىك باعدارلاماسىنىڭ ورىندالۋ بارىسى جايىندا بايانداعان ق ر يندۋستريا جانە ينفراقۇرىلىمدىق دامۋ ءمينيسترى رومان سكليار ايتتى، دەپ حابارلايدى قازاقپارات ءتىلشىسى.
«بيىل ءبىز وڭدەۋ ونەركاسىبىنىڭ ءوسىمىن 104 پايىزعا جەتكىزۋىمىز كەرەك. بۇل ءۇشىن ءوندىرىس كولەمىن ارتتىرۋ جانە جەتەكشىلىك ەتەتىن سالالاردا جۇمىس ورىندارىن ساقتاۋ شارالارى قابىلداناتىن بولادى. جالپى سوماسى 1,1 تريلليون تەڭگە بولاتىن120 عا جۋىق جوبانى ىسكە قوسۋ جوسپارلانىپ وتىر. وندا 20 مىڭ تۇراقتى جۇمىس ورنى قۇرىلادى»، - دەدى رومان سكليار.
ونىڭ دەرەگىنشە، مەتاللۋرگيا بويىنشا وتكەن جىلى شىعىس قازاقستان وبلىسىندا «باقىرشىق تاۋ-كەن ءوندىرۋ كاسىپورنى» جاۋاپكەرشىلىگى شەكتەۋلى سەرىكتەستىگىندە تاۋ-كەن بايىتۋ كەشەنى جانە قاراعاندى وبلىسىندا «Sary-Arka Copper Processing» جاۋاپكەرشىلىگى شەكتەۋلى سەرىكتەستىگىنىڭ كاتودتى مىس شىعارۋ زاۋىتى سياقتى ءىرى جوبالارى ىسكە قوسىلدى.
«بيىل وسى كاسىپورىندار مەن «ارسەلورميتتال تەمىرتاۋدىڭ» جوبالىق قۋاتقا شىعۋى سالانىڭ جوسپارلى كورسەتكىشكە قول جەتكىزىپ، وڭدەۋ ونەركاسىبىنىڭ ءوسىمىن قامتاماسىز ەتۋگە مۇمكىندىك بەرەدى. مۇنان بولەك، جىل سوڭىنا دەيىن قاراعاندى وبلىسىندا فەرروسيليتسيا وندىرەتىن زاۋىت، الماتى قالاسىندا بولات سپيرالدى قۇبىر وندىرەتىن زاۋىت ىسكە قوسىلادى»، - دەدى مينيستر.