قازاقستاندىقتارعا 20 - اقپانعا دەيىن جولعا شىقپاعانى ءجون
ۆلاديمير بەككەردىڭ ايتۋىنا قاراعاندا، 18-20 - ارالىعىندا كۇن رايىنىڭ بۇزىلاتىنى تۋرالى الدىن الا ەسكەرتۋ كەلگەن. وتكەن تاۋلىكتە الماتى، قاراعاندى جانە شىعىس قازاقستان وبلىستارىنىڭ جولدارىندا كولىكتەردىڭ ىركىلىسى تىركەلگەن.
«قازىرگى ۋاقىتتا كەپتەلىستەردىڭ ءبارى دە رەتكە كەلتىرىلدى. كولىكتەر قار قۇرساۋىنان شىعارىلدى. بۇگىنگى كۇنى قاراعاندى باعىتىنداعى جولدار جابىق. بالكىم، كەش باتقانشا جابىلعان جولداردىڭ سانى ارتۋى مۇمكىن» ، - دەيدى ۆلاديمير بەككەر ت ج ك- دا وتكەن باسپا ءسوز ءماسليحاتىندا.
ونىڭ ايتۋىنا قاراعاندا، قازاقستاندا وسىنداي كۇن رايى 20 - اقپانعا دەيىن جالعاسادى.
«الدىن الا جوسپارلانعان ساپاردى كەيىنگە قالدىرۋعا كەڭەس بەرەمىن. تاۋەكەلگە بارۋدىڭ قاجەتى قانشا؟ ازداعان بۇرقاسىن، كوكتايعاقتىڭ پايدا بولۋى - جول بويىندا وسىنداي جاعداي تۋىنداعاندا ءبىر جەرگە بارۋدىڭ قاجەتى بار ما؟ مۇمكىن بولسا، ساپاردان باس تارتقان ابزال. ءبارىبىر تاس جول جابىق بولادى. مىندەتتى ءتارتىپ بويىنشا جەڭىل بولسىن، اۋىر جۇك كولىگى بولسىن، جولدار ولارعا جابىق بولادى. مۇمكىندىگىنشە، قاۋىپسىزدىك ءۇشىن پويىزعا وتىرعان ءجون» ، - دەيدى ول.
ۆلاديمير بەككەردىڭ ايتۋىنشا، كۇن رايىنىڭ بۇزىلاتىنى تۋرالى ەسكەرتۋ وڭتۇستىكتەگى وڭىرلەر بويىنشا دا كەلگەن.
«تۇركىستان وبلىسىندا جاڭبىر كۇتىلەدى. جاڭبىردىڭ ەكپىنى قاتتى بولۋى ىقتيمال. وبلىس اۋماعىندا قار جوق دەسە دە بولادى. ال جاڭبىر جاۋادى» ، - دەيدى ۆ. بەككەر.