تۋعاننان ەكى كوزى كورمەيتىن 20 جاستاعى قازاق جىگىتىنىڭ تاعدىرى ەلدى جىلاتتى

None
None
 استانا. قازاقپارت - قىتايدا ومىرگە كەلگەن 19 جاستاعى نۇردانا ارعىن ۇلى ءبىر جىل بۇرىن اتامەكەنى قازاقستانعا ورالدى. ەلىمدى كورسەم دەگەن ارمانىنا جەتتى. تۋعاننان الەمنىڭ جارىعىن كورمەسە دە، كوكىرەگى وياۋ. ءار ءتۇرلى ءان ايتىپ، ءتۇرلى اسپاپتى وينايدى.

نۇردانا ارعىن ۇلى وتباسى مۇشەلەرى مەن اعايىن- تۋىستارىمەن بىرگە «قاراكەت» باعدارداماسىندا قوناقتا بولدى.

اتا- اناسى نۇردانانىڭ كوزى كورمەيتىنىن ءتاي- ءتايلاپ جۇرە باستاعاندا عانا بىلگەن. ءار جەرگە سوعىلىپ جۇرگەنىن كورگەندە عانا كۇماندانا باستاپ، دارىگەرگە قاراتقان. دارىگەرلەر ەكى كوزىنىڭ مۇلدە كورمەيتىنىن ايتىپتى. ال، وتا جاساۋعا كەلمەيدى. كوزىنىڭ جانارى ساۋ بولعانىمەن، تامىرى جۇقا دەپ كەسىپ ايتقان.

«مەنى اناڭا ۇقساعان سارى جىگىت ەكەنسىڭ دەيدى. سارى دەگەن قانداي ءتۇس دەپ سۇرايدى. قارا دەگەن قانداي دەپ سۇرايدى. سونداي كەزدەردە نە دەرىمدى بىلمەي قينالام. قاراڭعىدا باسىمدى سوعىپ الىپ، الدەنە تاپپاي قالسام دا، نۇردانام ءومىر بويى قاراڭعىلىقتا وتىر دەپ كوڭىلىم بوسايدى»، - دەدى اناسى نۇرگۇل ىسقاق.

نۇردانا وتباسىنىڭ تۇڭعىشى. ەكى قارىنداسى مەن ءىنىسى بار. بۇگىندە قازاقستاندا تۇرىپ جاتىر.



ەكى قارىنداسى باعدارلامادا اعاسى جايلى ايتا باستاعاننان، كوزىنە جاس الدى.

نۇردانا بالا كۇنىنەن راديو تىڭداپ، اۋەنگە ەلىتىپ وسكەن. ءوز بەتىنشە دومىرا ۇيرەنىپ، گيتارا، قوبىز، سىرناي سەكىلدى كوپتەگەن اسپاپتاردا وينايدى. دومبىرانى الدىنا قويىپ تارتادى. ءدال وسى ونەرى كوپشىلىكتى ءتانتى ەتتى. دومبىرانى سولاقاي دا تارتادى. ال، بۇراۋى وڭعا تەكشەلسە، بۇراۋىن بۇزباي وڭقاي دا تارتا بەرەتىنىن ايتتى.

نۇردانا قىتايداعى قازاقتار اراسىنا تانىلىپ ۇلگەرگەن. كوپتەگەن جارىستارعا، ارنا شوۋلارىنا قاتىسىپ، جەڭىمپاز اتانعان.

 

«مەنىڭ ۇلكەن ارمانىم اتا- انامنىڭ، باۋىرلارىمنىڭ، بارلىق ادامداردىڭ ديدارىن كورۋ. الەمدى كورۋ. اللانىڭ وسىنداي ونەر بەرگەنىنە شۇكىر دەيمىن. ءان ايتقاندى، بيلەگەندى جاقسى كورەم. جاقىندارىم مەنى ۇنەمى قولدايدى. ادامنىڭ قانداي ەكەنىن ىشكى تۇيسىگىممەن بىلەم. قىزدىڭ دا سۇلۋ، سۇلۋ ەمەس ەكەنىن تۇيسىگىممەن سەزە الام»، - دەيدى دانا.

ول جازۋ- سىزۋدى بىلمەيدى. ءسابي كۇنىنەن ۇيدە وسكەن. ءسوز ساپتاۋىنا قاراپ، ءسوز قۇدىرەتىن تۇسىنەتىن، كوكىرەگى وياۋ، ونەرلى جان ەكەنى بىردەن بايقاۋعا بولادى.

سوڭعى جاڭالىقتار