دەنيس تەن ءىسى: سوتتالۋشىلاردى 20 جىلعا باس بوستاندىعىنان ايىرۋى مۇمكىن

استانا. قازاقپارات - الماتىدا سپورتشى دەنيس تەننىڭ ءولىمى بويىنشا ءوتىپ جاتقان سوت پروتسەسىندە پروكۋرور سوتتالۋشىلارعا تۇرمە جازاسىن سۇرادى.

ازاتتىق ءتىلشىسىنىڭ سوتتان حابارلاۋىنشا، الماتى قالالىق قىلمىستىق ىستەر جونىندەگى مامانداندىرىلعان اۋدانارالىق سوتىندا پروكۋرور قۋاندىق دوسوۆ دەنيس تەندى ءولتىردى دەگەن كۇدىكتىلەر نۇرالى قياسوۆ پەن ارمان قۇدايبەرگەنوۆتى 20 جىلعا سوتتاۋدى، ال «قىلمىستى حابارلامادى» دەگەن كۇدىكتى جانار تولىبايەۆانى 4 جىلعا سوتتاۋدى سۇرادى. پروكۋروردىڭ ايتۋىنشا، سوت پروتسەسىندە سوتتالۋشىلاردىڭ ايىبى تولىق دالەلدەنگەن.

دەنيس تەننىڭ ءولىمى بويىنشا نەگىزگى سوت پروتسەسى 3- قاڭتاردا باستالعان.

24 جاستاعى نۇرالى قياسوۆ پەن ارمان قۇدايبەرگەنوۆ «قاراقشىلىق» جانە «كىسى ءولىمى» باپتارى بويىنشا ايىپتالىپ وتىر. سوتتالۋشى، 23 جاستاعى جانار تولىبايەۆاعا «قىلمىستى حابارلامادى» دەپ ايىپ تاعىلعان. قۇدايبەرگەنوۆ پەن تولىبايەۆا 11- قاڭتاردا سوتتا وزدەرىنە تاعىلعان ايىپپەن كەلىسپەيتىنىن مالىمدەپ، سوتتان ايىپتى وزگەرتۋدى سۇراعان. 14- قاڭتار كۇنگى سوتتا نۇرالى قياسوۆ «مەن كىنامدى تولىق مويىندايمىن، الايدا، ءبىز كىسى ولتىرەمىز دەپ الدىن الا جوسپارلاعان ەمەسپىز» دەگەن.

قازاقستاندىق مانەرلەپ سىرعاناۋشى، سوچي وليمپياداسىنىڭ قولا جۇلدەگەرى، ازيا ويىندارىنىڭ چەمپيونى دەنيس تەن بىلتىر 19- شىلدەدە الماتىدا پىشاقتالىپ، اۋرۋحانادا قازا تاپقان. سپورتشىنى قالا ورتالىعىندا كولىگىنىڭ جانىندا الدەكىمدەر پىشاقتاپ، اۋرۋحاناعا جەتكىزىلگەن سوڭ قايتىس بولعان. ول كولىگىنىڭ ايناسىن ۇرلاعان ادامداردى توقتاتپاق بولعان كەزدە جارالانعان.

«ازاتتىق»