رەسەي تەڭىزگە قۇلاعان ي ل-20 ۇشاعى ءۇشىن جاۋاپكەرشىلىكتى يزرايلگە ارتىپ وتىر
شام ەلى اسكەرى بولسا، زىمىران اتقىلاعاندا يزرايلدىك ۇشاقتار ءوز اۋماعىندا بولعانىن العا تارتقان. ي ل-20 ۇلگىسىندەگى بارلاۋشى ۇشاق ساعات تۇنگى 00.00 شاماسىندا راداردان جوعالىپ كەتتى. رەسەي مەن سيريا اقپارات قۇرالدارىنىڭ حابارلاۋىنشا، تاپ وسى ساتتە يزرايلدىڭ ءتورت اسكەري ۇشاعى سيريا اۋماعىنداعى نىسانداردى شابۋىلداعان. تويتارىس بەرۋگە تىرىسقان سيريا اسكەرى رەسەيلىك ۇشاقتى اتىپ ءتۇسىردى.
يگور كوناشەنكوۆ، ر ف قورعانىس مينيسترلىگىنىڭ وكىلى:
- يزرايلدىك ۇشقىشتار رەسەيلىك ۇشاقتى وزدەرىن بۇركەمەلەي وتىرىپ، سيريانىڭ زىمىرانداردان قورعانۋ جۇيەسىنىڭ سوققىسىنا ۇشىراتقان. ناتيجەسىندە س-200 جۇيەسىنىڭ زىمىرانى كولەمى جاعىنان ە ف-16 ۇشاعىنان ەداۋىر ۇلكەن ي ل-20-نى قاعىپ ءتۇسىردى.
سيريالىق سانا اقپارات اگەنتتىگىنىڭ حابارلاۋىنشا، يزرايل ۇشاقتارى حالىق تۇتىناتىن ونىمدەر شىعاراتىن فابريكالاردى بومبالاعان. ال شەتەلدىك اقپارات قۇرالدارى، يران قارۋ- جاراعى ساقتالعان قويمانى شابۋىلداعانىن حابارلاپ وتىر. رەسەي قورعانىس مينيسترلىگى وسى شابۋىل تۋرالى ەسكەرتۋ يزرايل اسكەريلەرىنەن تىم كەش تۇسكەن دەيدى.
يگور كوناشەنكوۆ، ر ف قورعانىس مينيسترلىگىنىڭ وكىلى:
- يزرايلدىڭ اسكەري باسشىلىعى جوسپارلاعان وپەراتسياسى تۋرالى بىزگە ەسكەرتكەن جوق. «جەدەل جەلى» بويىنشا حابارلاندىرۋ، سوققى جاساۋعا ءبىر مينۋتتان از ۋاقىت قالعاندا كەلگەن. وسىنىڭ سالدارىنان رەسەي ۇشاعىن قاۋىپسىز ايماققا شىعارا العان جوقپىز.
يگور كوناشەنكوۆ ءوز نىساندارىن اجىراتاتىن جۇيەنىڭ نەلىكتەن ىستەمەي قالعانىن تۇسىندىرگەن جوق. ءبىراق رەسەي اسكەرىنىڭ ءتيىستى شارا قابىلداۋىنا قۇقىعى بار ەكەنىن ەسكەرتتى. بۇل وقيعا ەكى ەلدىڭ اراقاتىناسىن ۋشىقتىرۋى ابدەن مۇمكىن. رەسەي قورعانىس ءمينيسترى سەرگەي شويگۋ يزرايلدىك ارىپتەسى اۆيگدور ليبەرمانمەن تەلەفون ارقىلى بايلانىسىپ، بۇكىل جاۋاپكەرشىلىكتى تەل- اۆيۆكە ارتقان.
www.24.kz