ساعىنتايەۆ استاناداعى نوسەر سالدارى جايلى: 20 جىل بويى بۇعان اتۇستى قاراپ كەلەمىز

None
None
استانا. قازاقپارات - ق ر پرەمەر-ءمينيسترى سوڭعى كۇندەرى نوسەر سالدارىنا بايلانىستى ەلوردانىڭ كوممۋنالدىق قىزمەتتەرىنىڭ جۇمىسىن كۇشەيتۋدى تاپسىردى، دەپ حابارلايدى قازاقپارات ءتىلشىسى.

ۇكىمەت وتىرىسى باستالعاندا كۇن تارتىبىندەگى ماسەلەلەردى تالقىلاماس بۇرىن باقىتجان ساعىنتايەۆ استانادا جاۋعان نوسەردىڭ سالدارى تۋرالى ءسوز قوزعادى. ول اتاپ وتكەندەي، سوڭعى 1-2 كۇندەرى تولاسسىز جاۋعان جاڭبىردىڭ سالدارىنان ءبىرقاتار كوشەلەر كولكىگەن سۋدىڭ استىندا قالعان. سونىڭ سالدارىنان جاياۋ جۇرگىنشىلەر جانە اۆتوكولىك يەلەرى زارداپ شەككەن.

«قوعامدىق كولىكتىڭ دە قوزعالىسى قيىنداپ كەتتى. بۇل ماسەلە جونىندە ەلباسى تاراپىنان دا بىرنەشە رەت ورىندى سىن-ەسكەرتۋلەر ايتىلعان بولاتىن. قالاداعى كارىز جۇيەسىن تۇپكىلىكتى شەشۋ تۋرالى ءتيىستى تاپسىرمالار دا بەرىلگەن. جالپى، قالاداعى جاعدايعا تولىق جاۋاپ بەرەتىن ول - اكىمدىك. ونى ءبارىمىز دە جاقسى بىلەمىز. سول سەبەپتەن، تابيعاتتىڭ وسىنداي توسىن مىنەزىنە دايىن بولۋ ءۇشىن، كوممۋنالدىق قىزمەتتەردىڭ جۇمىسىنىڭ تيىمدىلىگى ءۇشىن دە اكىمدىك جاۋاپتى ەكەنىن ەستەرىڭىزگە سالامىن. قالا تۇرعىندارى قالالىق كوممۋنالدىق قىزمەتتەردىڭ ناشار جۇمىسىنان زارداپ شەكپەۋى قاجەت. بىزدە باۋىرجان مومىش ۇلى داڭعىلى، تۇران داڭعىلى مەن ۇلى دالا كوشەلەرىنىڭ قيىلىسى، بارايەۆ، جاستار شاعىناۋدانىنىڭ سۋ استىندا قالۋى سوڭعى كەزدە قالىپتى جاعدايعا اينالىپ بارا جاتقان سياقتى»، - دەگەن ۇكىمەت باسشىسى قالا اكىمى اسەت يسەكەشەۆكە وسى ماسەلە بويىنشا قىسقاشا جاۋاپ بەرۋدى سۇرادى.

ءوز كەزەگىندە ەلوردا باسشىسى قالاداعى كارىز جۇيەسىنىڭ جۇمىسىن جاقسارتۋ باعىتىندا قانداي جۇمىس اتقارىلىپ جاتقانىن ايتىپ بەردى.

اسەت يسەكەشەۆتىڭ جاۋابىن تىڭداعان باقىتجان ساعىنتايەۆ استاناداعى اۆتوبۋستىڭ ىشىنە سۋ كىرىپ كەتكەن جاعدايدى ەسكە سالدى.

«ءبىرىنشى كەزەكتە وتە قيىن كوشەلەردە الدىن الا جۇمىستاردى اتقارىپ، تازالاپ قويۋ قاجەت. جۇرتشىلىقتىڭ ايتىپ وتىرعانى ماسەلەسى وسى. كارىز جۇيەلەرىن، سۋ جينالاتىن قۇدىقتاردى دا دەر كەزىندە تازالاۋ ماسەلەلەرىن قولعا الىپ، ءار جاۋىن جاۋعان سايىن سۋ استىندا قالاتىن ايماقتاردا ەندى قايتىپ مۇنداي جاعدايلار بولماۋ ءۇشىن كەشەندى شارالاردى دايىنداۋ كەرەك. وتكەن اپتادا ءسىز استانا قالاسىنىڭ بەس جىلدىق كەشەندى جوسپارىنىڭ باعدارلاماسىن ايتىپ ءوتتىڭىز. ونى ەلباسىنا دا دايىندادىڭىز. ءبىراق، سونىڭ ىشىندە وسى جاۋىن-شاشىننان كەيىن بولاتىن كارىزدەردىڭ جۇمىسىنا باسا نازار اۋدارۋ كەرەك. اسقار ۇزاقباي ۇلى (مامين - اۆت.)، كەشەندى جوسپاردى ۇكىمەتكە شىعارعانعا دەيىن تاعى دا ءبىر قاراپ شىعىڭىز. 20 جىل بويى بۇل ماسەلەگە اتۇستى قاراپ كەلدىك دەسە دە بولادى. جاۋىن وتكەننەن كەيىن ءبارى دە ۇمىتىلىپ قالىپ جاتىر»، - دەپ ءتۇيدى ۇكىمەت باسشىسى.

سوڭعى جاڭالىقتار