بوكسشىلارىمىز ازياداعا 20 كەلى جىلقى ەتىن الىپ اتتاندى

استانا. قازاقپارات - قازاقستاننىڭ 7 بوكسشىسى جاتتىقتىرۋشىلارمەن جانە دارىگەرلەرمەن بىرگە ازيا ويىندارىنا اتتاندى، دەپ حابارلايدى قازاقپارات ءتىلشىسى.

ق ر بوكس فەدەراتسياسىنىڭ مالىمەتىنشە، قازاقستان كومانداسى الدىمەن استانادان بانگكوكقا دەيىن ۇشادى. ودان كەيىن ءۇش ساعات ۇشاق كۇتىپ، 4 ساعات ۇشىپ دجاكارتاعا جەتەدى. العاشقى ەكى كۇندە بوكسشىلارىمىز دەمالىپ، جەرگىلىكتى كليماتقا، تاماعىنا بەيىمدەلەدى.

«العاشقى ەكى كۇن بەيىمدەلۋ ۋاقىتى. ال 18 ءى كۇنى ويىنداردىڭ اشىلۋ راسىمىنە قاتىسامىز. 19 ىنان باستاپ العاشقى كەزدەسۋلەرگە دايىندىقتى باستايمىز. وزىمىزبەن بىرگە 20 كەلى جىلقى ەتىن اكەتىپ بارامىز. جىگىتتەر كىمگە قانشا جانە قاي ۋاقىتتا جەۋ كەرەكتىگىن وزدەرى شەشەدى»، - دەدى ۇلتتىق قۇرامامىزدىڭ باس جاتتىقتىرۋشىسى مىرزاعالي ايتجانوۆ.

كوماندانىڭ دارىگەرى يرەك ساتوۆتىڭ ايتۋىنشا، ازيانىڭ ىستىق ەلدەرىندە ىشەك جۇقپالى اۋرۋلارىن جۇقتىرۋ قاۋپى جوعارى.

«سوندىقتان مۇمكىندىگىنشە قولدى ءجيى جۋۋ كەرەك. ءبىز شۇمەكتەن اعىپ تۇرعان سۋمەن ءتىزدى تازالاماۋعا كەڭەس بەرەمىز. بوتەلكەدەگى سۋدى پايدالانعان ءجون. بارلىق ۋاقىتتا دا مۇنداي جارىستارعا ۇلكەن جۇكپەن بارامىز. ال بۇل جولى ازيادانىڭ مەديتسينالىق شتابى كومەكتەسىپ، كەيبىر ءدارى-دارمەكتەرمەن قامتاماسىز ەتەدى. سوندىقتان بۇل جولى دجاكارتاعى دارىگەر مەن ماسساجشى 40 كەلىدەن استام ءدارى-دارمەك اپارا جاتىر»، - دەدى ول.

ايتا كەتەيىك، بوكسشىلارىمىزدىڭ شارشى الاڭداعى كەزدەسۋلەرى 24- تامىزدا باستالادى. فينالدىق جەكپە-جەكتەر 1- قىركۇيەكتە وتەدى.