قازاقستاندا قوقىستان 20 ءتۇرلى ءونىم جاسالادى

استانا. قازاقپارات - سوڭعى جىلدارى ەلىمىزدە وندىرىستىك جانە تۇرمىستىق قالدىقتاردى وڭدەۋ كولەمى ارتتى. وسى جۇمىستى ۇيلەستىرەتىن ارنايى كومپانيا دا قۇرىلعان بولاتىن، دەپ حابارلايدى قازاقپارات ءتىلشىسى.

ق ر ەنەرگەتيكا ءمينيسترى قانات بوزىمبايەۆتىڭ ايتۋىنشا، رەسپۋبليكا بويىنشا قاتتى تۇرمىستىق قالدىقتاردى جيناۋ، سۇرىپتاۋ مەن وڭدەۋمەن اينالىساتىن 130 كاسىپورىن بار. ولاردىڭ بارلىعى دايىن ءونىمنىڭ 20 ءتۇرىن شىعارادى.

«ماسەلەن، باتىس قازاقستان وبلىسىنىڭ اكىمدىگى قاتتى قالدىقتار پوليگونىن جەكەمەنشىك كومپانيانىڭ باسقارۋىنا بەردى. قازىرگى كەزدە ينفراقۇرىلىم جەلىلەرى تارتىلىپ جاتىر. ەكى جىلدىڭ ىشىندە قالدىقتاردى سۇرىپتاۋ مەن وڭدەۋ جەلىسى سالىنادى. ودان كەيىن شيكىزاتتان ەلەكتر ەنەرگياسى وندىرىلەدى»، - دەدى ق. بوزىمبايەۆ استانادا وتكەن باسپا ءسوز ءماسليحاتىندا.

بۇدان بولەك، الماتى قالاسىنىڭ الاتاۋ اۋدانىندا قوقىس وڭدەۋ كەشەنى سالىنادى. اتالعان كاسىپورىن ءبىر تاۋلىكتىڭ ىشىندە 1500 توننا قوقىستى وڭدەيتىن بولادى. اتالعان جوبانىڭ قۇرىلىسى ەكىنشى جارتى جىلدىقتا اياقتالادى دەگەن جوسپار بار. ال قاراعاندى قالاسىندا فين كومپانياسى قوقىستى وڭدەپ، گاز سينتەزىن ءوندىرۋدى جوسپارلاپ وتىر.