شىمكەنتتە تاۋلىگىنە 20 مىڭ جولاۋشى وتكىزەتىن جاڭا تەمىرجول ۆوكزالى سالىنادى
زاماناۋي ۇلگىدە بوي كوتەرەتىن تەمىرجول جەلىسىنىڭ تەحنيكالىق قۇرىلىسىنىڭ سيپاتىن وڭتۇستىك قازاقستان وبلىسىنىڭ اكىمى جانسەيىت تۇيمەبايەۆقا «بايلانىس جولدارىن دامىتۋ عىلىمي-زەرتتەۋ ينستيتۋتىنىڭ» باسشىلىعى تانىستىردى، دەپ حابارلايدى قازاقپارات ءتىلشىسى.
جوبا تۇجىرىمداماسى حالىقارالىق باستاماشىل توپپەن، جوبا جەتەكشىسى، ەكونوميكا عىلىمدارىنىڭ دوكتورى، پروفەسسور اليحان بيجانوۆ پەن تەحنيكا عىلىمدارىنىڭ دوكتورى، پروفەسسور، «بايلانىس جولدارىن دامىتۋ عىلىمي- زەرتتەۋ ينستيتۋتى» ج ش س-نىڭ ديرەكتورى التايبەك ورازبەكوۆ، ق ر ساۋلەتشىلەر وداعىنىڭ وقو فيليالىنىڭ ءتوراعاسى اسقار مامىربايەۆ جانە «قازاقستان تەمىر جولى» ۇلتتىق كومپانياسى» ا ق وكىلدەرىمەن بىرلەسە ازىرلەندى.
اتالعان توپ وكىلدەرىنىڭ سوزىنشە، بۇل جوبا زەرتتەۋ قورىتىندىسى بويىنشا پرەزيدەنتتىڭ «ءتورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىنا سايكەس كەلەدى. ويتكەنى تەمىر جول جەلىسىن سالۋ كەزىندە كولىك سالۋدىڭ جانە پايدالانۋدىڭ وزىق «سيفرلىق» تەحنولوگيالارى ەنگىزىلسە، كولىك پروتسەسىندە يننوۆاتسيالىق تەحنولوگيالار جۇزەگە اسىرىلاتىن بولادى.
شىم شاھاردىڭ باس جوسپارىنا ساي «باتىس ەۋروپا - باتىس قىتاي» حالىقارالىق كولىك ءدالىزىنىڭ بويىندا سالىنۋى ءتيىس ۆوكزالدىڭ جوباسى اياسىندا «شىمكەنت-2» جاڭا تەمىرجول ۆوكزالى مەن جۇكتى سۇرىپتاۋ ستانسياسى جانە ۇلكەن اۆتوۆوكزال سالىنادى دەپ جوسپارلانۋدا. سونىمەن بىرگە جالپى الاڭى 16 گەكتاردى قۇرايتىن جوبادا قوناق ءۇي مەن اكىمشىلىك عيمارات، 1000 اۆتوكولىككە ارنالعان تۇراق قاراستىرىلعان.
جوبا جەتەكشىسى شىمكەنت قالاسىنىڭ 2020 -جىلى بولاتىن ت م د ەلدەرىنىڭ مادەني استاناسى جىلىنا وراي، جوبانى ىسكە اسىرىپ، پايدالانۋعا بەرۋ مۇمكىندىگىن ايتتى. ءوز كەزىندە وبلىس اكىمى بۇل جوبانىڭ الەۋمەتتىك ماڭىزى بار ەكەنىن جانە جولاۋشىلارعا قىزمەت كورسەتۋدى جاقسارتۋعا جانە تۋريستەردى ايماققا تارتۋعا مۇمكىندىك بەرەتىنىن اتاپ ءوتتى.
وسىعان بايلانىستى ول ءتيىستى ۆەدومستۆو باسشىلارىنا جوبانى جۇزەگە اسىرۋ ءۇشىن جۇمىس توبىن قۇرۋدى تاپسىردى.
قازىرگى تاڭدا جوبا رەسپۋبليكالىق مەملەكەتتىك-جەكەشەلىك ارىپتەستىك جوبالارىن جوسپارلاۋ الگوريتمىنە سايكەس قازاقستان رەسپۋبليكاسىنىڭ ۋاكىلەتتى مەملەكەتتىك ورگاندارىمەن جۇمىس ۇيلەستىرۋ ساتىسىندا تۇر.
