استانانىڭ 20 جىلدىعى: قوستاناي وبلىسى ەلورداعا نە سىيلايدى

 استانا. قازاقپارات - قوستاناي وبلىسىنىڭ اكىمى ارحيمەد مۇحامبەتوۆ استانانىڭ 20 جىلدىق مەرەيتويىنا قانداي سىي تارتۋ ەتەتىندەرىن ايتىپ بەردى، دەپ حابارلايدى قازاقپارات ءتىلشىسى.

«استانانىڭ 20  جىلدىعى قۇرمەتىنە بىرنەشە وبلىسپەن بىرىگىپ، ۆەلوسيپەد جولدارىن سالىپ جاتىرمىز. وندا بيۋدجەتتىك قاراجات تا بار، دەمەۋشىلىك قولداۋلار دا بار. ماسەلەن، ۆەلوسيپەد جولدارى - بيۋدجەت اقشاسىنا جاسالسا، كىشىگىرىم ساۋلەتتىك مۇسىندەر دەمەۋشىلەر ەسەبىنەن بولماق. ءبىزدىڭ باستى مىندەتىمىز قۇرىلىستى ساپالى جۇرگىزىپ، ۋاقىتىندا پايدالانۋعا بەرۋ»، - دەپ جاۋاپ بەردى اكىم جۋرناليستەر سۇراعىنا ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

ايتا كەتەيىك، قازاقستان استاناسىن الماتىدان اقمولاعا كوشىرۋ تۋرالى شەشىم 1994 -جىلدىڭ 6 - شىلدەسىندە قابىلدانعان ەدى. استانانى رەسمي كوشىرۋ 1997 -جىلدىڭ 10 - جەلتوقسانىندا جۇزەگە اسىرىلدى. 1998 -جىلدىڭ 6 - مامىرىندا پرەزيدەنت جارلىعىمەن اقمولا اتاۋى استانا بولىپ وزگەرتىلدى.