اقمولا قالاسى 20 جىل بۇرىن استانا بوپ وزگەردى - ەلباسىنىڭ تاريحي جارلىعى

استانا. قازاقپارات - 1998 -جىلدىڭ 6 -مامىرىندا قازاقستان پرەزيدەنتى نۇرسۇلتان نازاربايەۆ «قازاقستان رەسپۋبليكاسىنىڭ استاناسى - اقمولا قالاسىن قازاقستان رەسپۋبليكاسىنىڭ استاناسى - استانا قالاسى دەپ قايتا اتاۋ تۋرالى» جارلىققا قول قويدى.

ياعني، وسىدان 20 جىل بۇرىن استانا تاريحىنداعى اسا ماڭىزدى قۇجات جارىققا شىققان بولاتىن، دەپ حابارلايدى قازاقپارات.

قازاقستاننىڭ جاڭا استاناسىنىڭ اتاۋىنا قاتىستى ماسەلە ول كەزدە قوعامدا ۇلكەن پىكىرلەر تۋدىرعان بولاتىن. جاڭا ەلوردانىڭ اتاۋىنا بايلانىستى ءتۇرلى ۇسىنىستار ءارتۇرلى دەڭگەيدە تالقىعا تۇسكەن ەدى. الايدا ەلباسى نۇرسۇلتان نازاربايەۆتىڭ استانا تۋرالى يدەياسى سول كەزدەگى قالالىق ءماسليحات دەپۋتاتتارىنا ۇسىنىلىپ، بۇل ءبىراۋىزدان قولداۋ تاپتى. وسىناۋ تاريحي كۇن جايىندا پرەزيدەنتتىڭ ءوزى: «ءبىر جولى تۇندە، دالىرەك ايتسام، ساعات تۇنگى ەكىدە استانا دەگەن اتاۋ ويىما ساپ ەتىپ، كوكەيىمە قونا كەتكەنى. استانا دەگەنىمىز استانا! قازاقشا ادەمى ەستىلەدى. قوماقتى، اۋىز تولادى، قىسقا دا نۇسقا، اۋەزدى. ورىسشا دا، اعىلشىنشا دا سولاي ەستىلەدى. بۇل اتاۋدا باتىلدىق، مىعىمدىق جانە ايقىندىق رەڭك بار. استانا!» دەپ ەسكە الادى. وسىدان سوڭ استانا قالاسىندا «سارىارقا» جانە «الماتى» اۋداندارى قۇرىلدى.

شىندىعىندا استانا - ەشقانداي تەرىس ماعىناسى نەمەسە باسقا ءبىر ءمانماتىنى جوق، ناقتى اتاۋ. ەلباسى ايتقانىنداي استانا حالىقارالىق تىلدە دە سولاي جاقسى، كەمكەتىكسىز ەستىلەدى.

ەسكە سالساق، ەلوردانى الماتىدان اقمولاعا اۋىستىرۋ تۋرالى شەشىمدى قازاقستان رەسپۋبليكاسى جوعارعى كەڭەسى 1994 -جىلى 6 -شىلدەدە قابىلدادى. استانانى رەسمي كوشىرۋ 1997 -جىلعى 10 -جەلتوقساندا جۇزەگە استى. پرەزيدەنتتىڭ 1998 -جىلعى 6 -مامىرداعى جارلىعىمەن اقمولانىڭ اتاۋى استانا بولىپ وزگەرتىلدى. جاڭا استانانىڭ حالىقارالىق تۇساۋكەسەرى 1998 -جىلعى 10 -ماۋسىمدا ءوتتى. 1999 -جىلى استانا يۋنەسكو شەشىمىمەن «الەم قالاسى» اتاعىن الدى. قازاقستاننىڭ باس قالاسى 2000 -جىلدان باستاپ استانالار مەن ءىرى قالالاردىڭ حالىقارالىق اسسامبلەياسىنىڭ مۇشەسى اتاندى.

بيىل استاناعا 20 جىل تولادى.