قوستانايدا پارا العان 20 ءتارتىپ ساقشىسى سوتتالدى

قوستاناي. قازاقپارات - قوستانايدا «سىبايلاس جەمقورلىقتى توقتات!» اكسياسى ۇيىمداستىرىلدى، دەپ حابارلايدى قازاقپارات.

ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ وبلىستىق دەپارتامەنتى مەن «گرين» قوستاناي وبلىسىنىڭ ازاماتتىق اليانسى» قوعامدىق قورى بىرلەسىپ كولىك جۇرگىزۋشىلەر اراسىندا «سىبايلاس جەمقورلىقتى توقتات!» اتتى اكسيا وتكىزدى. اتالعان شارا بارىسىندا قالانىڭ تەحنيكالىق قىزمەت كورسەتۋ ورتالىقتارىنىڭ بىرىنە كەلگەن اۆتوكولىكتەرگە «پارا بەرمەيمىن!» جازۋى بار جاپسىرمالار ءىلىندى.

 

«ءبىز بۇل ارقىلى سىبايلاس جەمقورلىققا اپاراتىن ءىس ارەكەتتەردى بولدىرماۋ جانە جولدارداعى قۇقىقبۇزۋشىلىقتارعا جول بەرمەۋدى كوزدەيمىز. وسى ماقساتتا جۇرگىزۋشىلەرگە ءتۇسىندىرۋ جۇمىستارى جۇرگىزىلدى. اكسياعا ارنايى مونيتورينگتىك توپ مۇشەلەرى قاتىستى. اكسيا قاتىسۋشىلارىنىڭ كوبى پارا بەرگىسى كەلمەيتىنىن جانە كەلەشەكتە دە ونداي قادامعا بارمايتىنىن ايتىپ، سەندىردى. مىنە، وسىنداي جوبالار ارقىلى جەمقورلىقتىڭ الدىن الۋعا بولادى»، - دەيدى ۆەدومستۆونىڭ باسپا ءسوز حاتشىسى ايدا باجيروۆا.

 

2017 -جىلى دەپارتامەنت وتكىزگەن سىبايلاس جەمقورلىققا قارسى مونيتورينگكە سايكەس، سوتتالعان 55 ادامنىڭ 20 سى نەمەسە %36 ى ىشكى ىستەر ورگاندارىنىڭ قىزمەتكەرلەرى بولىپ شىقتى. ايدا باجيروۆا ايتقانداي، ءتارتىپ ساقشىلارى تاراپىنان جول بەرىلەتىن سىبايلاس جەمقورلىق فاكتىلەرىن ازايتۋ ءۇشىن مۇنداي اكسيالار الداعى ۋاقىتتا دا جالعاسىن تاپپاق.