ماكەدونيا استانانىڭ 20 جىلدىعىنا تارتۋ رەتىندە ءبىرقاتار شارالار وتكىزبەك
بۇل تۋرالى استانا قالاسىنىڭ مادەنيەت، مۇراعاتتار جانە قۇجاتتاما باسقارماسى حابارلادى.
«استانا قالاسىنىڭ مادەنيەت، مۇراعاتتار جانە قۇجاتتاما باسقارماسىنىڭ باسشىسى بولات ماجاعۇلوۆ ماكەدونيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى يليا پسالتيروۆپەن كەزدەستى. كەزدەسۋ بارىسىندا تاراپتار ءوزارا مادەني بايلانىستى ودان ءارى دامىتۋ ماسەلەلەرىن تالقىلادى» دەلىنگەن حابارلامادا.
ەلشىنىڭ ايتۋىنشا، ماكەدونيا استانانىڭ 20 -جىلدىعىن مەرەكەلەۋگە ۇلەس قوسۋعا نيەتتى جانە ەلوردا تۇرعىندارى مەن قوناقتارىنا تارتۋ رەتىندە ءبىرقاتار شارالار وتكىزبەك.
«ءبىز قازاق حالقىنىڭ باي مادەنيەتى مەن سالت- داستۇرىنە ءتانتىمىز. سونداي- اق، جەرگىلىكتى فولكلورلىق جانە تەاترلىق ۇجىمداردى ماكەدونياعا شاقىرامىز» ، - دەدى ديپلومات.
قازىرگى كەزدە مەرەيتويلىق داتانى مەرەكەلەۋگە بەلسەندى دايىندىق ءجۇرىپ جاتىر.
«رەسمي شارالار 10 - جەلتوقساندا باستاۋ الىپ، جىل بويى جالعاسادى. ەلوردالىق ۇجىمدار، اتاپ ايتقاندا، تەاترلار، فيلارمونيا، بي انسامبلدەرى رەسپۋبليكامىزداعى ۇزدىكتەردىڭ ءبىرى - ولار جىل سايىن استانادا جۇزدەگەن شارا وتكىزەدى جانە الەمدىك ساحنادا قازاقستاندى تانىتۋعا دايىن» ، - دەدى بولات ماجاعۇلوۆ كەزدەسۋ بارىسىندا.