عالىمداردىڭ بولجامىنا سايكەس 2050 جىلعا قاراي كيبورگ- اسكەرلەر پايدا بولادى
ول تۋرالى مالىمەت ا ق ش ارمياسىنىڭ اسكەري مۇمكىندىكتەرىن دامىتۋ بويىنشا حيميا- بيولوگيالىق ورتالىقتىڭ حاتتاماسىندا جاريالاندى.
حاتتامانىڭ اتاۋى - «كيبورگ- اسكەرلەر-2050: ادامزات جانە ماشينانىڭ بىرىگۋى جانە ونىڭ قورعانىس مينيسترلىگى بولاشاعىنا اسەرى».
بيوينجەنەريا سالاسىنىڭ اعا عىلىمي قىزمەتكەرى پيتەر ەمانۋەلدىڭ ويىنشا، 30 جىلدان سوڭ ا ق ش اسكەرلەرى نەيروندى يمپلانتتاردىڭ كومەگىمەن مي مەن ماشينانى تىكەلەي بايلانىستىرا وتىرىپ درونداردى قولدانا الاتىن بولادى. يمپلانتتار ءار دروننىڭ نە باقىلاپ تۇرعانىن ناقتى كورۋگە مۇمكىندىك بەرەدى، سودان سوڭ قول جەتكەن اقپاراتتى تسيفرلىق فورمادا ميعا اپارادى جانە دەرەك كوزى رەتىندە باسقا ماشينالارعا تاسىمالدايدى.
مي جانە كومپيۋتەر اراسىنداعى بايلانىس نەيروندى يمپلانتتار نەگىزىندە جۇزەگە اسادى. بۇل حاتتامادا كورسەتىلگەن 4 ءتۇرلى وزگەرىستىڭ تەك بىرەۋى عانا. يمپلانتتار تومەندە كورسەتىلگەن ءتورت كاتەگورياعا جاتادى:
- ەكىجاقتى دەرەكتەردى الماستىرۋ ءۇشىن ادام ميىنداعى نەيرون قىزمەتىنىڭ تىكەلەي كۇشەيۋى؛
- كورۋ قابىلەتى، ۆيزۋاليزاتسيانى جاقسارتۋ ماقساتىندا كوزدىڭ قىزمەتىن جەتىلدىرۋ؛
- ەستۋ قابىلەتىن جەتىلدىرۋ؛
- وپتوگەنەتيكالىق كوستيۋم ارقىلى دەنە بۇلشىق ەتتەرىنە باقىلاۋ ورناتۋ.
اۆتورلاردىڭ ايتۋىنشا، امەريكالىق قوعام كيبەرنەتيكالىق اسكەرلەردى مۇلدەم قابىلداماۋى مۇمكىن. بۇل جاعدايدا ەتيكالىق جانە مادەني داستۇرلەرى وزگەشە ەلدەر جوعارىدا اتالعان تەحنولوگيالاردى قولدانا وتىرىپ، اسكەري سالادا ءبىراز جەتىستىككە جەتۋلەرىنە مۇمكىندىك بار.
پيۋ زەرتتەۋ ورتالىعىنىڭ الەۋمەتتانۋشى عالىمى امەريكالىق قوعامنىڭ كيبەر- اسكەرلەرگە قاتىستى كوزقاراسىن انىقتادى. ناتيجەسىندە، ادام قانشالىقتى دىنگە جاقىن بولسا، سونشالىقتى بۇل يدەيادان باس تارتاتىنى بەلگىلى بولدى. زەرتتەۋ توبىنىڭ مالىمدەمەسىنە سايكەس، الداعى ۋاقىتتا باسقا ەلدەردە دە تاجىريبە جۇرگىزۋگە نيەتتى.
«بۇل تەحنولوگيا اسكەري قيمىلداردى باسىپ وزادى. ءتىپتى اسىپ تۇسەدى. ءبىزدىڭ الەم جانە ادامعا قاتىستى تانىم- تۇسىنىگىمىزدى تۇبەگەيلى وزگەرتەدى»، - دەدى پيتەر ەمانۋەل.