پاۆلودار وبلىسىندا «سەرپىن-2050» باعدارلاماسى اياسىندا 1677 ستۋدەنت ءبىلىم الۋدا
شاراعا وبلىس اكىمىنىڭ ورىنباسارى مەيرام بەگەنتايەۆ پەن مەملەكەتتىك قۇرىلىمداردىڭ وكىلدەرى قاتىستى.
پىكىرالماسۋ الاڭىندا جاستاردى جۇمىسقا ورنالاستىرۋ، جۇمىسپەن قامتۋ، مەملەكەت تاراپىنان كورسەتىلەتىن قولداۋ تۇرلەرى تۋرالى ءسوز قوزعالدى.
وبلىستىق ءبىلىم بەرۋ باسقارماسى تەحنيكالىق جانە كاسىپتىك ءبىلىم بەرۋ ءبولىمى باسشىسىنىڭ مىندەتىن اتقارۋشى الما ايتۋاروۆانىڭ ايتۋىنشا، بۇگىنگى تاڭدا وڭىردە اتالمىش باعدارلاما بويىنشا 1677 ستۋدەنت ءبىلىم الادى.
بيىل وقۋىن اياقتايتىن 539 جاستىڭ 413- ءى جوعارى وقۋ ورىندارىنىڭ، 126-سى كوللەدجدەردىڭ ستۋدەنتتەرى. پەداگوگيكالىق ماماندىق بويىنشا 146 ادام، تەحنيكالىق باعىتتا 393 ادام جاس مامان قاتارىنا قوسىلادى. ولاردىڭ بارلىعى وقۋ ورنى جانىنداعى جاتاقحانادا تۇرادى. ستۋدەنتتەردى دايارلاۋ ەڭبەك نارىعىندا سۇرانىسقا يە تەحنيك- ەلەكتريك، تەحنيك- باعدارلامالاۋشى، مال دارىگەرى سياقتى ماماندىقتار بويىنشا جۇزەگە اسىرىلادى.
- بىلتىرعى جىلى سەرپكىندىكتەردىڭ العاشقى لەگى قولدارىنا ديپلومدارىن الدى، - دەيدى الما ايتۋاروۆا.
- ونىڭ ىشىندە 67 ادامنىڭ 14- ءى وبلىستا قالدى. بيىل وقۋ ورنىن اياقتاعان 174 ستۋدەنتتىڭ 86-سى جۇمىسقا ورنالاستى، 35- ءى جوعارى وقۋ ورىنداردا ءبىلىمىن جالعاستىردى. 36 ادام ءتۇرلى سەبەپتەرمەن ءوز وڭىرلەرىنە قايتىپ ورالدى.
جاستار باستامالارىن دامىتۋ ورتالىعىنىڭ جەتەكشىسى تولەگەن ايتبايەۆ ستۋدەنتتەردىڭ اراسىندا باسپانا جانە جۇمىسقا ورنالاسۋعا قاتىستى كوپتەگەن قيىندىقتار بار ەكەنىن ايتادى.
- وسىعان بايلانىستى مەملەكەتتىك قۇرىلىمداردىڭ وكىلدەرى ءتۇرلى باعدارلامالار تۋرالى باياندادى، - دەيدى تولەگەن ايتبايەۆ. - كوبىنەسە جاستاردى «7-20-25» جانە «ديپلوممەن اۋىلعا» باعدارلامالارى قىزىقتىردى. ستۋدەنتتەردى ورتالىقتىڭ جۇمىسىمەن تانىستىردىق. بۇل جەرگە ولار كۇن سايىن «ءبىر تەرەزە» جۇيەسى بويىنشا ءارتۇرلى كەڭەس الا الادى.
وڭىرلىك جۇمىسپەن قامتۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى حەلۋا قاشكەنوۆا ۇسىنعان مالىمەتكە سۇيەنسەك، قونىس اۋدارۋشىلارعا كورسەتىلەتىن مەملەكەتتىك قولداۋ اياسىندا وتباسى مۇشەلەرىنىڭ ءارقايسىسىنا 35 اەك - 84175 تەڭگە كولەمىندە جولاقىعا جاردەماقى بەرىلەدى.
باسپانا جالعا الۋ، كوممۋنالدىق قىزمەت تولەماقىسى شىعىندارى وتەلىپ، قىزمەتتىك باسپانا ۇسىنىلادى جانە جۇمىسقا ورنالاسۋعا كومەك كورسەتىلەدى.
ماسەلەن، شارباقتى اۋدانىندا تۋعان ولگا ماكيشيەۆا استانا قالاسىندا جوعارى وقۋ ورنىن اياقتاعاننان كەيىن تۋعان جەرىنە ورالعان.
- كۇيەۋىممەن جانە بالالارىمەن اۋدانىما قايتىپ كەلدىم، - دەيدى ول. - ورتالىق اۋداندىق اۋرۋحانادا تەراپيا ءبولىمىنىڭ مەڭگەرۋشىسى بولىپ جۇمىس ىستەيمىن. كەلگەن كەزدە ۋاقىتشا باسپانا ۇسىندى. بۇدان كەيىن پاتەر ساتىپ الۋعا قولايلى شارتتارمەن قارىز الدىق. پاتەردى ءوزىمىز تاڭداپ الدىق. سونىمەن قاتار ەكەۋمىزگە دە كوتەرمەاقى بەرىلدى.
ەسكە سالا كەتەيىك، بىلتىر وبلىستا «سەرپىن-2050» باعدارلاماسى بويىنشا ءبىلىم العان جاستاردىڭ 47- ءسى نەمەسە 70 پايىزى ءوز وڭىرلەرىنە ورالعان. اتالمىش مەملەكەتتىك الەۋمەتتىك باعدارلاما وڭىرىمىزدە 2014 -جىلدان باستاپ جۇزەگە اسىرىلۋدا.