بيىل الماتى وبلىسىندا 204 جاس ءوسپىرىم جۇكتى بولعان
بۇل تۋرالى ءدىن، ءتىل، ەتنوسارالىق قاتىناستار، ىشكى جانە جاستار ساياساتى ماسەلەلەرى جونىندە تۇراقتى كوميسسيانىڭ وتىرىسىندا بەلگىلى بولدى، دەپ حابارلايدى Azattyq Rýhy.
«بيىل 1-مامىرعا دەيىن وبلىستا 204 قىز بالا جۇكتى بولعان. ولار 15-17 جاستا. ال بىلتىرعى 1 -مامىرداعى كورسەتكىش بويىنشا ولاردىڭ سانى 228 جەتكەن. جۇكتى بولعان قىزداردىڭ باسىم بولىگى - كوللەدجدە وقيتىندار»، - دەدى الماتى وبلىستىق ىشكى ساياسات باسقارماسى باسشىسىنىڭ ورىنباسارى ەلدار ساپاروۆ.
ۆەدومستۆو وكىلىنىڭ ايتۋىنشا، ۇلتتىق ستاتيستيكا بيۋروسىنىڭ دەرەكتەرىنە سايكەس 2021 -جىلى الماتى وبلىسىندا NЕЕT ساناتىنداعى جاستار سانى 21560 ادامعا جەتكەن. ولاردىڭ ءبىلىمى جوق. ەش جەرگە جۇمىسقا ورنالاسپاعان.
«قازىر وسىنداي جاستاردى جۇمىسپەن قامتۋ ءۇشىن ءتۇرلى جوبالار جۇزەگە اسىپ جاتىر. ماسەلەن، Zhas project جوباسى بار. اتالعان جوبانى ىسكە اسىرۋ ءۇشىن رەسپۋبليكا بويىنشا 380,7 ميلليون تەڭگە ءبولىندى. 4 وڭىردە جالپى 250 شاعىن گرانت كوزدەلگەن، ونىڭ ىشىندە الماتى وبلىسىنا 63 جوبانىڭ ءارقايسىسىنا 1 ميلليون تەڭگەدەن قاراستىرىلعان. جوباعا 18 بەن 29 جاس ارالىعىنداعى جاستار قاتىسا الادى»، - دەپ تولىقتىردى ەلدار ساپاروۆ.