قازاقستاندا 2028 -جىلدان باستاپ كەپىلدەندىرىلگەن زەينەتاقى وسەدى

نۇر- سۇلتان. قازاقپارات - ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ قازاقستاندىقتاردىڭ كەپىلدەندىرىلگەن مەملەكەتتىك مينيمالدى زەينەتاقىنى ارتتىرۋ جوسپارىمەن ءبولىستى، دەپ حابارلايدى قازاقپارات ءتىلشىسى.

«ب ج ز ق- داعى زەينەتاقى جيناعىنىڭ قازىرگى از مولشەرىن ەسكەرە وتىرىپ، ۇكىمەت پەن ۇلتتىق بانك زەينەتاقى جۇيەسىن دامىتۋدىڭ بارلىق شاراسىن قابىلداپ جاتىر. الايدا بۇل رەتتە مەملەكەت تاراپىنان كەپىلدەندىرىلگەن ءبىر بولىك بولۋى ءتيىس. وسى سەبەپتى ءبىز پرەزيدەنتكە 2028 -جىلدان باستاپ مەملەكەت جۇمىس ءوتىلى مەن ايلىق مولشەرىنە قاراماستان بەرەتىن كەپىلدەندىرىلگەن مينيمالدى زەينەتاقىنى ەنگىزۋ باستاماسىن ۇسىندىق. بۇل ۇسىنىس زەينەتاقى جۇيەسىن جاڭعىرتۋ تۇجىرىمىندا جازىلعان»، - دەدى ءبىرجان نۇرىمبەتوۆ پارلامەنت سەناتىندا وتكەن دوڭگەلەك ۇستەل بارىسىندا.

قازىرگى تاڭدا ايلىق اۋدارىم مەن جۇمىس وتىلىنە قاراماستان بازالىق زەينەتاقى تولەمىن بارلىق زەينەتكەر الادى. 2020 -جىلى ونىڭ مولشەرى كۇنكورىس مينيمۋمىنىڭ 54 پايىزىن، ياعني 16,8 مىڭ تەڭگەنى قۇراعان.

«2028 -جىلدان باستاپ بەس جىلدان از ۋاقىت جۇمىس ءوتىلى بارلارعا كۇنكورىس مينيمۋمىنىڭ 70 پايىزىنا تەڭ بازالىق زەينەتاقى بەرۋدى جوسپارلاپ وتىرمىز. ال ول تۇستا كۇنكورىس مينيمۋمى قازىرگىدەن قاراعاندا 1,5 ەسە كوپ بولۋى ءتيىس»، - دەدى ول.

ەسكە سالا كەتسەك، بۇعان دەيىن ۇكىمەت ازاماتتاردىڭ زەينەتاقى جيناعىن پايدالانۋ مۇمكىندىگى بويىنشا پرەزيدەنتكە ۇسىنىس بەرگەنىن حابارلاعان ەدىك.

اۆتور ايان بەكەن ۇلى