پرەزيدەنتكە الماتىنىڭ 2025 -جىلعا دەيىنگى دامۋ جوسپارىنىڭ نەگىزگى باسىمدىقتارى تانىستىرىلدى
2 شىلدە 11:50

پرەزيدەنتكە الماتىنىڭ 2025 -جىلعا دەيىنگى دامۋ جوسپارىنىڭ نەگىزگى باسىمدىقتارى تانىستىرىلدى

نۇر- سۇلتان. قازاقپارات - پرەزيدەنت قاسىم- جومارت توقايەۆ الماتى قالاسىنىڭ اكىمى ەربولات دوسايەۆتى قابىلدادى، دەپ حابارلايدى قازاقپارات اقورداعا سىلتەمە جاساپ.

مەملەكەت باسشىسىنا الماتى قالاسىنىڭ بيىلعى قاڭتار- مامىر ارالىعىنداعى الەۋمەتتىك- ەكونوميكالىق جاعدايى تۋرالى ەسەپ بەرىلدى. سونداي- اق، قالا اكىمى ەكونوميكانىڭ تۇراقتى ءوسىمىن قامتاماسىز ەتۋگە قاتىستى پرەزيدەنت تاپسىرمالارىنىڭ ورىندالۋ بارىسى جونىندە باياندادى.

ونىڭ ايتۋىنشا، قىسقا مەرزىمدى ەكونوميكالىق ينديكاتور 107,6 پايىزعا دەيىن وسكەن، نەگىزگى كاپيتالداعى ينۆەستيتسيالاردىڭ ءوسىمى 20,9 پايىزدان اسقان، ساۋدا- ساتتىق قالپىنا كەلتىرىلگەن، جۇمىس ىستەپ تۇرعان شاعىن جانە ورتا بيزنەس سۋبەكتىلەرىنىڭ سانى 19,5 پايىزعا ارتقان.

قاسىم- جومارت توقايەۆقا «الماتى قالاسىنىڭ 2025 -جىلعا دەيىنگى دامۋ جوسپارىنىڭ نەگىزگى باسىمدىقتارى جانە 2030 -جىلعا دەيىنگى ورتا مەرزىمدى پەرسپەكتيۆالار» جوباسى ۇسىنىلدى. مەملەكەت باسشىسىنا اباي داڭعىلىنىڭ وڭتۇستىگىندە، تاۋلى جانە تاۋ بوكتەرىندەگى ايماقتاردا 9 قاباتتان بيىك عيماراتتاردىڭ قۇرىلىسىن جۇرگىزۋگە تىيىم سالاتىن جاڭا ەرەجەلەردىڭ قابىلدانۋى، سونداي- اق ينجەنەرلىك ينفراقۇرىلىمدى جاڭارتۋ جوسپارى تۋرالى مالىمەت بەرىلدى.

ەربولات دوسايەۆ ماڭىزدى الەۋمەتتىك ماسەلەلەردى شەشۋگە، ونىڭ ىشىندە «الماتى جاستارى» باعدارلاماسى اياسىندا جۇمىس ىستەيتىن جاستارعا تۇرعىن ءۇي ساتىپ الۋعا، مەديتسينالىق- الەۋمەتتىك مەكەمەلەردە تاماقتاندىرۋ ساپاسىن ارتتىرۋعا، سيرەك كەزدەسەتىن اۋرۋلاردى تەگىن ءدارى- دارمەكپەن قامتاماسىز ەتۋگە، بالالارعا ارنالعان سپورت سەكسيالارى مەن شىعارماشىلىق ۇيىرمەلەرىن قارجىلاندىرۋعا قاراجات بولىنگەنىن جەتكىزدى. كەزدەسۋ سوڭىندا پرەزيدەنت الماتى قالاسىن ودان ءارى دامىتۋ جانە تۇرعىنداردىڭ تۇرمىس ساپاسىن ارتتىرۋ جونىندە ءبىرقاتار تاپسىرما بەردى.

جاڭالىقتار