ساراپشى 2025-جىلعا قاراي مۇناي ونىمدەرىن ەڭ كوپ تۇتىناتىن ەلدەردى اتادى
«قازىرگى ۋاقىتتا الەم بويىنشا مۇناي قورىنىڭ 33 پايىزى - تاياۋ شىعىستا، 20 پايىزى - سولتۇستىك امەريكادا، 13 پايىزى – ت م د ەلدەرىندە، 10 پايىزى - افريكادا، 7 پايىزى - وڭتۇستىك امەريكادا، 4 پايىزى - ەۋروپادا شوعىرلانعان. ءوز ايماقتارى بويىنشا ازەربايجان مەن قازاقستان مۇنايدىڭ ءىرى ەكسپورشىلارى رەتىندە پوزيتسياسىن ساقتاپ وتىر. شيكى مۇنايدى قابىلدايتىن باستى ايماق - ەۋروپا ەلدەرى. بۇل رەتتە قازاقستاننىڭ بەلسەندىلىگىن ەرەكشە اتاپ ءوتۋ كەرەك. ءوزىنىڭ گەوگرافيالىق ارتىقشىلىعىن پايدالانا وتىرىپ، قازاقستان باتىسىندا - كاسپي تەڭىزى، شىعىسىندا - قىتاي ارقىلى مۇناي ەكسپورتىن ارتتىرۋدى كوزدەيدى»، - دەدى رادج شەحار ەلوردادا ءوتىپ جاتقان «ورتالىق ازياداعى مۇناي وڭدەۋ مەن مۇناي حيمياسى» اتتى حالىقارالىق كونفەرەنسيادا.
«GlobalData» كومپانياسى وكىلىنىڭ ايتۋىنشا، مۇناي ونىمدەرىن تۇتىنۋ جاعىنان 2019-جىلى ا ق ش كوش باسىندا تۇرعانىمەن، 2025-جىلعا قاراي قىتاي نارىقتىڭ ەڭ ۇلكەن ۇلەسىنە يە بولادى.
«قىتاي مەن ءۇندىستاننىڭ كەلەشەكتە مۇناي ونىمدەرىنە دەگەن سۇرانىسى ارتا بەرەدى. وزدەرىڭىز بىلەتىندەي، بالامالى ەنەرگيا كوزدەرىن ىزدەۋ، وتىن مەن قالدىقتاردى شىعارۋ بويىنشا ستاندارتتاردى ەنگىزۋ، قىسقا جانە ۇزاق مەرزىمدە سۇرانىس ءوسىمىن شەكتەۋ ماسەلەلەرى بار. ايتسە دە، موتور مايى، بەنزين، ديزەل وتىنى، سونداي-اق، تومەندەتىلگەن مۇناي-گاز -نەگىزگى سۇرانىستىڭ باستى فاكتورلارى رەتىندە قالا بەرەدى»، - دەدى ول.
رادج شەحار ورتالىق ازيادا مۇناي ونىمدەرىنە سۇرانىس 30 پايىزعا ارتقانىن ايتادى. ساراپشىنىڭ ويىنشا، بۇل تەندەنتسيا ءالى ساقتالادى.
«ورتالىق ازيا ەلدەرىندەگى مۇناي وڭدەۋ زاۋىتتارىنىڭ قۋاتتىلىعىن ارتتىرۋ ىشكى نارىقتىڭ سۇرانىسىن قامتاماسىز ەتۋگە مۇمكىندىك بەرەدى. ايماق مۇحيتپەن شەكتەسىپ جاتقان جوق. سول سەبەپتى، تابىستى تەك ەكسپورتتى ارتتىرۋمەن عانا كوبەيتۋگە بولادى»، - دەدى «GlobalData» كومپانياسىنىڭ مۇناي جانە گاز باعىتى بويىنشا ديرەكتورى.