قازاقستان 2025-جىلعا قاراي قانشا مۇناي وندىرەدى؟
بۇل تۋرالى بۇگىن ەلوردادا حالىققا ەسەپ بەرۋ كەزدەسۋى بارىسىندا ق ر ەنەرگەتيكا ءمينيسترى قانات بوزىمبايەۆ ايتتى، دەپ حابارلايدى قازاقپارات ءتىلشىسى.
«بارلىق سەكتورلار شەگىندەگى كورسەتكىشتەردە مۇناي-گاز سالاسى وتكەن جىلدىڭ سايكەس كەزەڭىمەن سالىستىرعاندا ءوسىم كورسەتىپ وتىر. جوسپارلى 1 پايىز ءوسىم كەزىندەگى ناقتى ءوسىم بەس ايدا 6,5 پايىزدى قۇراپ وتىر. مۇنايدى قايدا وڭدەۋ كولەمى 6,3 ميلليون تونناعا جەتىپ، 2017-جىلدىڭ سايكەس كەزەڭىمەن سالىستىرعاندا 6,2 پايىز ءوسىم بولدى»، - دەدى مينيستر.
ونىڭ ايتۋىنشا، مۇناي ەكسپورتتاۋ ءوسىمىنىڭ جوسپارى 1,4 پايىز بولعان، ال ناقتى ءوسىم 5,7 پايىزعا جەتىپ وتىر. گاز ءوندىرۋ جوسپارى 0,8 پايىز بولعاندا، ناقتى ءوسىم 6,4 پايىزعا جەتتى. سۇيىتىلعان جانە تاۋارلىق گاز ءوندىرىسى ءوسىمىنىڭ جوسپارى 3 جانە 4,1 پايىزدى قۇراسا، ناقتى ءوسىم سايكەسىنشە 4,7 جانە 7,6 پايىزدى قۇرادى.
«وزدەرىڭىز دە كورىپ وتىرعانداي، ديناميكا تاڭ قالدىرادى. ەلىمىزدىڭ مۇناي ءوندىرۋ ءوسىمىنىڭ درايۆەرى تەڭىز، قاراشىعاناق جانە قاشاعان سىندى ءۇش ءىرى مۇناي-گاز جوباسى بولىپ تۇر. ولار ورتا مەرزىمدى كەزەڭدە ەل ەكونوميكاسىنىڭ وسىمىنە ايتارلىقتاي ۇلەس قوسادى. مۇناي ءوندىرۋ كولەمى جىل سايىن ارتىپ كەلەدى جانە ءبىزدىڭ بولجامىمىزشا، 2025-جىلعا قاراي كەمىندە 104 ميلليون توننالىق دەڭگەيگە جەتۋگە ءتيىسپىز»، - دەدى قانات بوزىمبايەۆ.