توقايەۆ: 2025-جىلعا دەيىن ءبىلىم سالاسىنا بولىنەتىن قاراجات 6 ەسەگە وسەدى
بۇل تۋرالى ۇلتتىق قوعامدىق سەنىم كەڭەسىنىڭ 3-وتىرىسىندا ق ر پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«ۇلتتىق كەڭەس 1 جىلعا جۋىق ۋاقىت ارالىعىندا اسا ماڭىزدى ءارى اۋقىمدى رەفورمالاردى پىسىقتاپ، جۇزەگە اسىردى. قوعامدىق ديالوگتىڭ ۇلتتىق مودەلى ءوز تيىمدىلىگىن كورسەتتى. قازىر الداعى كەزەڭنىڭ كۇنتارتىبىن انىقتاپ الۋىمىز قاجەت. كەز كەلگەن مەملەكەت ءۇشىن ادامي كاپيتال باستى ولشەمگە اينالدى. وسى ورايدا بىلىكتىلىك ماسەلەسى ايرىقشا ماڭىزعا يە بولىپ وتىر. ءار ازامات ءوزىنىڭ جەكە جەتىستىگى ارقىلى بۇكىل ەلدىڭ تابىستى بولۋىنا، ءوسىپ- وركەندەۋىنە ۇلەس قوسادى. سوندىقتان بۇگىنگى وتىرىستى ادامي كاپيتالدىڭ نەگىزگى باعىتتارىن دامىتۋ ماسەلەسىنە ارنادىق. بۇل ءبىلىم بەرۋ، عىلىم جانە دەنساۋلىق سالاسى»، - دەدى مەملەكەت باسشىسى.
ق ر پرەزيدەنتى جاڭا احۋال ءبىلىم بەرۋ جانە عىلىم جۇيەسىن تۇبەگەيلى رەفورمالاۋدى تالاپ ەتىپ وتىرعاندىعىن باسا ايتتى.
«ەندى بۇل سالانىڭ ماڭىزى ارتا تۇسەتىنى انىق. ءتىپتى ەكونوميكانىڭ ءوزى سوعان تاۋەلدى بولماق. ءبىز ءبىلىم مەن عىلىم سالاسىنىڭ بولاشاقتاعى ءرولىن ايقىن ءتۇسىنۋىمىز كەرەك. بۇكىل مەملەكەتتىك ساياساتتى سوعان سايكەس جۇزەگە اسىرامىز. ءبىلىم بەرۋدى جانە عىلىمدى دامىتۋدىڭ 2025 -جىلعا دەيىنگى مەملەكەتتىك باعدارلاماسى بويىنشا جۇزەگە اسىرىلاتىن رەفورمالاردى قايتا زەردەلەۋ قاجەت. 2025 -جىلعا دەيىن ءبىلىم سالاسىنا بولىنەتىن قاراجات 6 ەسە، عىلىمعا بولىنەتىن قارجى 7 ەسە وسەتىنىن ەسكەرگەن ءجون»، - دەدى قاسىم-جومارت توقايەۆ.