ەلجان ءبىرتانوۆ: 2025 - جىلى دارىگەرلەردىڭ ورتاشا ەڭبەكاقىسى 500 مىڭعا جەتۋى ءتيىس

None
None
نۇر- سۇلتان. قازاقپارات - دارىگەرلەردىڭ ورتاشا ەڭبەكاقىسى ەلدەگى ورتاشا ەڭبەكاقىدان 2,5 ەسە كوپ بولۋى كەرەك.

ق ر دەنساۋلىق ساقتاۋ ءمينيسترى ەلجان ءبىرتانوۆ جەدەل جاردەم جاساقتارى مەن ستاتسيونارلىق قابىلداۋ بولىمدەرىنىڭ اراسىنداعى IV رەسپۋبليكالىق جارىستىڭ اشىلۋىندا وسىلاي ءمالىم ەتتى، دەپ حابارلايدى قازاقپارات ءتىلشىسى.

ءمينيستردىڭ ايتۋىنشا، قازىرگى تاڭدا ەلدەگى مەديتسينا قىزمەتكەرلەرىنىڭ ورتاشا ەڭبەكاقىسى 240 مىڭ تەڭگە كولەمىندە. ءبىراق بۇل سالا ماماندارىنىڭ كوبى وسىنشا مولشەردە جالاقى الىپ ءجۇر دەگەن ءسوز ەمەس.

«ءبىز ماۋسىم ايىندا عانا مەديتسينا قىزمەتكەرلەرىنىڭ ەڭبەكاقىسىن وسىردىك. ونىڭ ىشىندە جەدەل جاردەم وكىلدەرى دە بار. مينيسترلىك ونى بارلىعى العانىن قاداعالاۋ ءۇشىن جاعدايعا مونيتورينگ جۇرگىزىپ وتىر. بۇل ىسكە اكىمدىكتەر مەن كاسىپوداقتى دا تارتتىق. ەڭبەككە ساي جالاقى بولۋى ماڭىزدى. ورتاشا ەڭبەكاقى ەڭ جوعارعى ايلىق پەن ەڭ تومەنگىنىڭ اراسىنان الىناتىنىن ۇمىتپاۋ كەرەك. بىزدە بۇل كورسەتكىش 240 مىڭ تەڭگە مولشەرىندە. ال سالاداعى ەڭبەك ءوتىلى مەن ساناتى تومەن مامانداردىڭ كوبى 120-140 مىڭ تەڭگە الىپ ءجۇر. كورشىلەس رەسەيدە دارىگەرلەردىڭ ورتاشا ەڭبەكاقىسى بىزدەن 2 ەسە ارتىق. سوندىقتان دا، ماماندار بىزدە تۇراقتاماي جاتىر»، - دەدى ەلجان ءبىرتانوۆ ب ا ق وكىلدەرىنىڭ سۇراعىنا جاۋاپ بەرە وتىرىپ.

ول سونداي- اق، الداعى بەس جىلدا دارىگەرلەردىڭ ەڭبەكاقىسىن كوتەرۋ جوسپارلانىپ وتىرعانىن ايتادى.

«دارىگەرلەردىڭ ەڭبەكاقىسىن كوتەرۋ بويىنشا ناقتى قادام جاسالىپ جاتىر. 2025 - جىلعا قاراي مەديتسينا قىزمەتكەرلەرىنىڭ ورتاشا ەڭبەكاقىسى 500 مىڭ تەڭگە بولۋى ءتيىس. ءبىزدىڭ ويىمىزشا، مەديتسينا قىزمەتكەرلەرىنىڭ ورتاشا ەڭبەكاقىسى ەلدەگى ورتاشا ەڭبەكاقىدان 2,5 ەسە ارتىق بولۋى كەرەك. وسى كەزدە عانا ماماندار تۇراقتاپ، ىنتامەن جۇمىس ىستەيتىن بولادى. ويتكەنى، دارىگەر ناقتى جۇمىسقا كىرىسۋ ءۇشىن 10 جىل كولەمىندە وقيدى. جۇمىسقا كىرىسە سالىپ ءوز بەتىمەن كۇردەلى شەشىمدەر قابىلداۋى كەرەك. مۇنى وزگە ماماندىقتارمەن سالىستىرۋعا بولمايدى. ءبىز الەمنىڭ وزگە ەلدەرىندەگى جاعدايدى ەسكەرە وتىرىپ وسىنداي ويعا كەلدىك»، - دەدى ەلجان ءبىرتانوۆ.

ءمينيستردىڭ ايتۋىنشا، وسىعان قاراماستان قازاقستاندا جەدەل جاردەم قىزمەتى بەدەلدى ماماندىقتاردىڭ ءبىرى سانالادى.

ەسكە سالساق، ق ر دەنساۋلىق ءمينيسترى ەلجان ءبىرتانوۆ الداعى ەكى جىلدا جەدەل جاردەم قىزمەتىنە 800 جاڭا كولىك بەرىلەتىنىن ايتقان بولاتىن.

سوڭعى جاڭالىقتار