ەۋرو-2024: قازاقستان قۇراماسى ءوز توبىندا ءۇشىنشى ورىنعا كوتەرىلدى

استانا. قازاقپارات - فۋتبولدان 2024 -جىلعى ەۋروپا چەمپيوناتىنا ىرىكتەۋ ساتىسى اياسىندا قازاقستان قۇراماسى سىنعا تۇسەتىن H توبىندا 2-تۋردان كەيىن تۋرنير كەستەسى بەلگىلى بولدى، دەپ حابارلايدى قازاقپارات ءتىلشىسى.

اتالعان توپتاعى ەكىنشى تۋر ويىندارىن سولتۇستىك يرلانديا - فينليانديا كەزدەسۋى تۇيىندەدى.

العاشقى تۋردا سولتۇستىك يرلانديا سىرت الاڭدا سان- مارينونى 2:0 ەسەبىمەن تىزە بۇكتىرسە، فينليانديا قۇراماسى دانياعا 1:3 ەسەبىمەن جول بەردى.

ەكى قۇراما اراسىنداعى ويىندا فينليانديا العاشقى بولىپ ەسەپ اشتى. ونى بەنيامين كياللمان 28-مينۋتتا ءوزىنىڭ ەنشىسىنە جازدى.

وسىلايشا فينليانديا قۇراماسى قارسىلاسىن 1:0 ەسەبىمەن تىزە بۇكتىرىپ، العاشقى جەڭىسىنە قول جەتكىزدى.

ەسكە سالساق، اتالعان توپتا 26- ناۋرىزدا قازاقستان قۇراماسى ءوز الاڭىندا دانيانى 3:2 ەسەبىمەن تىزە بۇكتىردى.

سونداي- اق، سلوۆەنيا ءوز الاڭىندا سان- مارينونى 2:0 ەسەبىمەن جەڭدى.

ەكىنشى تۋردان كەيىن التى ۇپايمەن سلوۆەنيا كوش باستاپ تۇر. ءتورت قۇراما ءۇش ۇپايدان جينادى. فينليانديانىڭ جەڭىسىنەن كەيىن دانيا ەكىنشى، قازاقستان ءۇشىنشى ورىنعا كوتەرىلدى. ودان كەيىنگى ورىندارداعى فينليانديا مەن سولتۇستىك يرلانديا دا ءۇش ۇپايدان ەنشىلەگەن. ازىرگە سان- مارينو قۇراماسىندا ۇپاي جوق.

ەندى اتالعان توپتا ءۇشىنشى تۋردا 16- ماۋسىمدا فينليانديا - سلوۆەنيا، دانيا - سولتۇستىك يرلانديا، سان- مارينو - قازاقستان قۇرامالارى كەزدەسەدى.

اۆتور

ءادىلجان ۇمبەت