الەمدەگى ەڭ باقىتتى ەلدەر-2023 ءتىزىمى شىقتى: قازاقستان نەشىنشى ورىندا؟
بۇل تۋرالى بۇگىن، 20- ناۋرىز، حالىقارالىق باقىت كۇنىندە نيۋ-يوركتە تانىستىرىلعان جىل سايىنعى «جاھاندىق باقىت» تۋرالى باياندامانىڭ قورىتىندىسىندا ايتىلعان.
رەسەيدىڭ ۋكرايناعا قارسى سوعىسىنا جانە فينليانديانىڭ ناتوعا كىرۋىنە بايلانىستى ەۋروپاداعى قاۋىپسىزدىك جاعدايىنىڭ ايتارلىقتاي ناشارلاۋىنا قاراماستان، بۇل سكانديناۆيا ەلى التىنشى جىل قاتارىنان باقىت رەيتينگىندە كوش باستادى.
ۇزدىك بەستىكتە دانيا، يسلانديا، يزرايل جانە نيدەرلاندى، ودان كەيىن شۆەتسيا، نورۆەگيا، شۆەيتساريا، ليۋكسەمبۋرگ جانە جاڭا زەلانديا بار. گەرمانيا ءبىر جىل ىشىندە رەيتينگتە ەكى ساتى تومەندەپ، 16-ورىنعا جايعاسقان. سالىستىرمالى تۇردە جوعارى ورىنداردى بالتىق جاعالاۋى ەلدەرى - ليتۆا (20)، ەستونيا (31) جانە لاتۆيا (41) يەلەندى. باياندامادا كورسەتىلگەن 137 ەلدىڭ ىشىندە سەررا-لەونە، ليۆان جانە اۋعانستان ەڭ باقىتسىز ەلدەر تىزىمىندە سوڭىندا تۇر.
بۇل رەتتە قازاقستان 44-ورىندا، كورشىلەرىمىز - وزبەكستان 54-ورىندا، قىرعىزستان 62-ورىندا، رەسەي 70-ورىندا تۇر.
بايانداما اۆتورلارىنىڭ ايتۋىنشا، جالپى العاندا، 2020-2022-جىلدارى پلانەتا تۇرعىندارىنىڭ باسىم بولىگىنىڭ ومىرگە دەگەن باعاسى پاندەمياعا جانە باسقا دا داعدارىستارعا قاراماستان تۇراقتى دەڭگەيدە قالدى. كەيىنگى ء ۇش جىلداعى كورسەتكىشتەر الدىڭعى ءۇش جىلمەن سالىستىرعاندا ورتا ەسەپپەن جوعارى بولعان. ساراپشىلاردىڭ ايتۋىنشا، باقىت پەن ءال-اۋقات حالىق اراسىندا مۇمكىندىگىنشە بىركەلكى بولىنگەن ەلدەردە ادامدار ءوزىن باقىتتىراق سەزىنەدى.
جىل سايىنعى جاھاندىق باقىت ەسەبىن امەريكا قۇراما شتاتتارىنىڭ عالىمدارى Gallup International سوتسيولوگيالىق ۇيىمدار قاۋىمداستىعى كەيىنگى ءۇش جىلدا جۇرگىزگەن ساۋالنامالار نەگىزىندە دايىندايدى. باقىت يندەكسى التى نەگىزگى كريتەري - الەۋمەتتىك قولداۋ، تابىس، دەنساۋلىق، ەركىندىك، جومارتتىق جانە سىبايلاس جەمقورلىقتىڭ بولماۋى بويىنشا ەسەپتەلەدى.