سايلاۋ-2023: بۇگىن - تىنىشتىق كۇنى

استانا. قازاقپارات - ءماجىلىس جانە ءماسليحاتتار دەپۋتاتتارىنىڭ كەزەكتەن تىس سايلاۋى الدىنداعى تىنىشتىق كۇنى باستالدى، دەپ حابارلايدى قازاقپارات ءتىلشىسى.

18-ناۋرىز ساعات 00:00 دەن باستاپ دەپۋتاتتىققا كانديداتتاردىڭ سايلاۋعا قاتىستى ۇگىت- ناسيحات نەمەسە باسقا دا جۇمىس جۇرگىزۋىنە تىيىم سالىنعان.

ايتا كەتسەك، سايلاۋالدى ۇگىت- ناسيحات ناۋقانى 18-اقپاندا ساعات 18.00-دە باستالاپ، بۇگىن اياقتالدى.

ورتالىق سايلاۋ كوميسسياسىنىڭ مالىمەتىنشە، ەرتەڭ وتەتىن سايلاۋعا 12032550 داۋىس بەرۋشى تىركەلدى.

«كانديداتتاردى ۇسىنۋ سايلاۋدى تاعايىنداۋ تۋرالى جارلىق جاريالانعان كۇننەن باستالادى جانە 20 كۇنگە سوزىلادى، 8 اقپاندا ءار ايماقتا جەرگىلىكتى ۋاقىت بويىنشا ساعات 18.00-دە اياقتالادى. ۇمىتكەرلەردى تىركەۋ 20-قاڭتاردان 18-اقپانعا دەيىن جالعاسادى. سايلاۋ الدىنداعى ۇگىت- ناسيحات 18-اقپان كۇنى ساعات 18:00 دە باستالىپ، 18-ناۋرىز ساعات 00:00 گە دەيىن جۇرگىزىلەدى. 18-ناۋرىز - تىنىشتىق كۇنى. 19-ناۋرىز - سايلاۋ كۇنى»، - دەگەن ەدى ق ر ورتالىق سايلاۋ كوميسسياسى ءتوراعاسىنىڭ ورىنباسارى كونستانتين پەتروۆ.

ونىڭ ايتۋىنشا، سايلاۋ كۇنى ۋچاسكەلەردە داۋىس بەرۋ جەرگىلىكتى ۋاقىت بويىنشا ساعات 07:00-دەن 20:00-گە دەيىن جۇرگىزىلەدى.

ەسكە سالساق، مەملەكەت باسشىسىنىڭ جارلىعىنا سايكەس ءماجىلىس جانە ءماسليحاتتار دەپۋتاتتارىنىڭ كەزەكتەن تىس سايلاۋى 19-ناۋرىزدا وتەدى.

ءماجىلىس پەن ءماسليحات سايلاۋىنا 7 پارتيا قاتىسادى. اتاپ ايتقاندا، «Amanat» پارتياسى، «اۋىل» حالىقتىق- دەموكراتيالىق پارتياسى، «Respublica» پارتياسى، «قازاقستان حالىق پارتياسى»، «بايتاق» جاسىلدار پارتياسى، «اق جول» پارتياسى جانە «جالپىۇلتتىق سوتسيال- دەموكراتيالىق پارتياسى .

ماجىلىسكە بارلىعى 98 دەپۋتات سايلانادى. ونىڭ 70 پروتسەنتى، ياعني 69 ورىن پروپورتسيونالدىق جۇيەمەن 5 پايىزدىق مەجەدەن وتكەن ساياسي پارتيالاردىڭ ءتىزىمى بويىنشا سايلانادى. ال، قالعان 30 پروتسەنت، ياعني 29 ورىن ءبىر مانداتتى وكرۋگتەردەن سايلاناتىن دەپۋتاتتارعا بەرىلەدى.

استانا، الماتى، شىمكەنت جانە 17 وبلىستىڭ ءماسليحاتتارى سايلاۋىندا پارتيالىق ءتىزىم جانە ءبىر مانداتتى وكرۋگتەردىڭ اراقاتىناسى 50/50 بولادى. ال، قالالىق، اۋداندىق ءماسليحاتتار 100 پايىز ءبىر مانداتتى وكرۋگتەر ارقىلى سايلانعان دەپۋتاتتاردان تۇرادى.

اۆتور

داۋلەت ىزتىلەۋ