ناۋرىز-2023: استانانىڭ قاي جەرلەرىندە مەرەكەلىك شارالار وتەدى
ەلوردادا ناۋرىز مەرەكەسىنە وراي جۇزدەن استام شارا وتەدى. قالانىڭ 4 اۋدانىندا ناۋرىز مەيرامى اتالىپ وتەتىن 23 ورىن انىقتالدى. تۇرعىندار مەن استانا قوناقتارى كونسەرتتەرگە، مەرەكەلىك باعدارلامالارعا، قويىلىمدارعا، ۇلتتىق سپورت تۇرلەرى بويىنشا جارىستارعا قاتىسا الادى.
«21-23- ناۋرىز كۇندەرى بارلىق اۋداندا، سونىڭ ىشىندە ەلوردانىڭ ەلدى مەكەندەرىندە «ناۋرىز دۋمان» مادەني-بۇقارالىق شارالارى ۇيىمداستىرىلادى. ءىس-شارادا ۆەدومستۆولىق باعىنىستى ۇيىمدار مەن شىعارماشىلىق ۇجىمداردىڭ قاتىسۋىمەن كونسەرتتىك باعدارلامالار، ءتۇرلى كوستيۋم كيگەن كەيىپكەرلەر مەن قۋىرشاقتار شوۋى قاراستىرىلعان. سونداي-اق، جينالعان جۇرت ۇلتتىق سپورت تۇرلەرى بويىنشا جارىستارعا قاتىسا الادى»، - دەدى نۇران قامزين ەلوردالىق كوممۋنيكاتسيالار قىزمەتىندە.
ونىڭ ايتۋىنشا، 21- ناۋرىز كۇنى ساعات 13:00-18:00 ارالىعىندا، 22- ناۋرىز كۇنى 11:00-18:00 دەيىن، 23- ناۋرىز كۇندەرى - EXPO كورمە كەشەنى اۋماعىندا كوشپەلىلەر وركەنيەتىنىڭ اۋقىمدى فەستيۆالى ۇيىمداستىرىلادى. فەستيۆال اياسىندا قازاق كۇرەسى، ارقان تارتىس، گىر كوتەرۋ سياقتى ۇلتتىق سپورت تۇرلەرىنەن جارىستار وتەدى.
ءتول ۇلتتىق مادەنيەت پەن ءداستۇر اتموسفەراسىن سەزىنۋ ماقساتىندا اۋقىمدى ەتنواۋىلدىڭ اشىلۋى، قولونەرشىلەر جارمەڭكەلەرى، ۇلتتىق تاعامدار فەستيۆالى جانە باسقا شارالار جوسپارلانىپ وتىر.
وسى كۇندەرى EXPO حالىقارالىق كورمەسى ورتالىعىندا مەرەكەلىك ءىس-شارانىڭ تۇجىرىمداماسىنا سايكەس، وتاندىق قولونەرشىلەردىڭ قاتىسۋىمەن «ناۋرىز بازارى» جارمەڭكەسى وتەدى. «ناۋرىز بازارى» شىعىس جارمەڭكەسىندە ەتنوستيلدەگى بۇيىمداردىڭ - كەراميكا، مەتال، كيىز جانە جىبەكتەن جاسالعان زاتتاردىڭ، كادەسىيلاردىڭ جاڭا توپتامالارى ۇسىنىلادى.
ەلىمىزدىڭ ءار وڭىرىنەن كەلگەن ەڭ جاقسى شارۋا قوجالىقتارى مەن تاۋار وندىرۋشىلەردىڭ جاڭا ونىمدەرى ءتيىمدى باعامەن قولجەتىمدى بولادى. مەرەكە قۇرمەتىنە بارلىق تاۋارلارعا ۇلكەن جەڭىلدىكتەر جوسپارلانىپ وتىر.
21-23- ناۋرىز ارالىعىندا ءار اۋداندا ەكى نەگىزگى الاڭ - بارلىعى 8 ورىن انىقتالدى. وندا مادەنيەت باسقارماسىنىڭ جەتەكشىلىگىمەن جاپپاي مەرەكەلەۋ مەن كونسەرتتىك باعدارلامالار ۇيىمداستىرىلادى. قالعان ورىندار ەلوردانىڭ اۋداندىق اكىمدىكتەرىنىڭ اپپاراتتىق ەسەبىنەن قامتاماسىز ەتىلەدى.
الماتى اۋدانى بويىنشا - «قازاق ەلى» مونۋمەنتى الاڭى، «جەلەزنودوروجنىي» تۇرعىن الابى، «جەرۇيىق» ساياباعى، «كۇيشىلەر اللەياسى»، «ينتەرناتسيونالنىي» جانە «ميچۋرينو» تۇرعىن الابىندا وتەدى.
ەسىل اۋدانىندا - EXPO كورمە كەشەنى، «بايتەرەك» مونۋمەنتى جانە «پريگورودنىي»، «ارناۋ»، «زەلەنىي كۆارتال» تۇرعىن الاپتارىندا، «جاعالاۋ» سكۆەرىندە، «نازاربايەۆ» ورتالىعىندا وتەدى.
سارىارقا اۋدانى بويىنشا - قالالىق الاڭدا، «كوكتال» ساياباعى، «قورعالجىڭ» ساياباعى، «اگروگورودوك» تۇرعىن الابىندا وتەدى.
بايقوڭىر اۋدانى بويىنشا - «اتاتۇرىك» ساياباعى، «جازۋشىلار» اللەياسى، «كيرپيچنىي»، «كازگورودوك»، «ءوندىرىس» تۇرعىن الاپتارىندا وتەدى.
16-18- ناۋرىز كۇندەرى ساعات 10:00-18:00 ارالىعىندا س. سەيفۋللين مۋزەيىندە «قوش كەلدىڭ، ءاز ناۋرىز» كورمەسى ۇيىمداستىرىلادى.
17- ناۋرىز كۇنى ساعات 19:30 دا جاستار سارايىندا «ناۋرىز دۋمان» اتتى كونسەرت وتەدى.
20- ناۋرىزدا مەملەكەتتىك اكادەميالىق فيلارمونيادا مادەنيەت سالاسىنداعى «ناۋرىز» ۇلتتىق سىيلىعى تابىستالادى.
21- ناۋرىزدا Qazaqstan ورتالىق كونسەرت زالىندا ءشامشى قالداياقوۆتىڭ شىعارماشىلىعىنا ارنالعان «ءانىم سەن ەدىڭ» مەرەكەلىك كونسەرتى جوسپارلانعان.
23- ناۋرىز كۇنى ساعات 17:00 دە جاستار سارايىندا ناۋرىزعا ارنالعان مەرەكەلىك باعدارلاما - «ماگيا ستەپي» اتتى يلليۋزيا جانە مۋزىكا شوۋى وتەدى.
24- ناۋرىزدا Qazaqstan ورتالىق كونسەرت زالىندا ق ر حالىق ءارتىسى التىنبەك قورازبايەۆتىڭ 75 جىلدىق مەرەيتويىنا ارنالعان شىعارماشىلىق كەش وتەدى.
استانا قالاسىنىڭ تەاترلارى دا بۇل مەرەكەدە قالىس قالماي، جاڭا پرەمەرالار ۇسىنادى. سونىمەن قاتار، 18-26- ناۋرىز ارالىعىندا قۋىرشاق تەاترى «ناۋرىز دۋمان» اتتى ادام بويىنداي قۋىرشاقتار شوۋىن ۇسىنادى. قالانىڭ ورتالىقتاندىرىلعان كىتاپحانالار جۇيەسى دە مەرەكەدەن تىس قالماي، كۇن سايىن ناۋرىز مەيرامىنا وراي ءىس-شارالار وتكىزۋدى باستادى. بارلىق شارالار بويىنشا اقپاراتتى مادەنيەت باسقارماسىنان نەمەسە تيكەتون. ك ز سايتىنان الۋعا بولادى»، - دەدى ن. قامزين.