سەناتتا 2023 -جىلعا ارنالعان رەسپۋبليكالىق بيۋدجەتكە تۇزەتۋلەر قابىلداندى
اتاپ ايتقاندا، بيىلعا ارنالعان رەسپۋبليكالىق بيۋدجەتتىڭ پارامەترلەرى كەلەسىدەي قالىپتاستى، ياعني بيۋدجەت تۇسىمدەرى 1,5 تريلليون تەڭگەگە ۇلعايا وتىرىپ،
19,3 تريلليون تەڭگەنى قۇراماق. تاپشىلىق جالپى ىشكى ونىمگە قاراعاندا %2,7 دەڭگەيىندە ساقتالدى. رەسپۋبليكالىق بيۋدجەتتىڭ شىعىستارى 22,5 تريلليون تەڭگە كولەمىندە جوسپارلانىپ وتىر.
جالپى شىعىستاردىڭ قوسىمشا ۇلعايۋى 2,2 تريلليون تەڭگە شاماسىندا بولدى جانە كەلەسى باسىم باعىتتاردى قامتيدى:
بىرىنشىدەن، مەملەكەت باسشىسىنىڭ جولداۋى مەن سايلاۋالدى باعدارلاماسى اياسىندا ايتىلعان باستامالاردى، سونداي-اق وڭىرلەرگە جۇمىس ساپارلارى كەزىندەگى تاپسىرمالاردى ىسكە اسىرۋعا قوسىمشا 2 تريلليون تەڭگە بولىنبەك.
«بۇل تۇرعىدا وڭىرلەردى قولداۋعا، اۋىل شارۋاشىلىعىن، كولىك ينفراقۇرىلىمىن جانە وڭدەۋشى ونەركاسىپتى ودان ءارى دامىتۋعا، الەۋمەتتىك سالانىڭ جەكەلەگەن باعىتتارىنا ارنالعان شىعىستار قامتىلدى»، - دەدى مينيستر.
بۇل باعىت اياسىندا جىلۋمەن جابدىقتاۋ جۇيەلەرىن سالۋ جانە رەكونسترۋكتسيالاۋ، ەلەكتر ەنەرگەتيكاسىن دامىتۋعا 144 ميلليارد تەڭگە جۇمسالادى. ال قورعانىس جانە ازاماتتىق قورعاۋدى قامتاماسىز ەتۋ، ونىڭ ىشىندە ورتكە قارسى قىزمەت قىزمەتكەرلەرىنىڭ جالاقىسىن كوتەرۋگە، ازاماتتىق قورعاۋ ورگاندارىنىڭ ماتەريالدىق- تەحنيكالىق بازاسىن نىعايتۋعا 126 ميلليارد تەڭگە باعىتتالماق. سونىمەن قاتار، تۇرعىن ءۇي ساتىپ الۋ ءۇشىن قارىزدار مەن تۇرعىن ءۇي جيناق سالىمدارى بويىنشا سىيلىقاقىلار بەرۋگە 92 ميلليارد تەڭگە قاراستىرىلادى.
«ەكىنشىدەن، باسقا دا ءبىرقاتار ماڭىزدى مىندەتتەردى ىسكە اسىرۋعا 186 ميلليارد تەڭگە باعىتتالادى. بيۋدجەتتى قايتا قاراۋ ناتيجەسىندە ەكونوميكانىڭ ناقتى سەكتورى مەن وڭىرلەردى قولداۋعا ەرەكشە ءمان بەرىلدى. مۇنى شىعىستاردىڭ قۇرىلىمىنىڭ وزگەرۋىنەن بايقاۋعا بولادى. اتاپ ايتساق، ەكونوميكانىڭ ناقتى سەكتورىن قولداۋعا قوسىمشا 1,3 تريلليون تەڭگە كوزدەلگەن. وسى ورايدا شىعىستاردىڭ جالپى كولەمىندەگى بۇل باعىتتىڭ ۇلەسى 5,3 پايىزعا ارتتى. ناتيجەسىندە اتالعان سالاعا ارنالعان شىعىستار
3,5 تريلليون تەڭگە نەمەسە جالپى شىعىستاردىڭ %15,6 مولشەرىندە جوسپارلانىپ وتىر. بۇل ورتا مەرزىمدە ەلدىڭ دامۋىنا وڭ مۋلتيپليكاتيۆتىك اسەر ەتەتىن بولادى»، - دەدى ە. جاماۋبايەۆ.
مۇنىمەن قوسا، الەۋمەتتىك سالانىڭ شىعىستارى 298 ميلليارد تەڭگەگە ءوستى جانە 8,5 تريلليون تەڭگە سوماسىندا جوسپارلاندى نەمەسە بيۋدجەتتىڭ جالپى شىعىستارىنىڭ 37,5 پايىزىن قۇراپ وتىر. قاراجات «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسىن ىسكە اسىرۋعا، مەكتەپكە دەيىنگى ءبىلىم بەرۋ مەكەمەلەرى پەداگوگتەرىنىڭ جالاقىسىن كوتەرۋگە جانە كوللەدج ستۋدەنتتەردىڭ ستيپەنديالارىن ۇلعايتۋعا، الەۋمەتتىك تولەمدەردىڭ، جاردەماقىلاردىڭ مولشەرلەرىن ارتتىرۋعا، دەنساۋلىق ساقتاۋ جۇيەسىن ودان ءارى دامىتۋعا باعىتتالادى.
بۇدان بولەك، كۇش قۇرىلىمى شىعىستارى 317 ميلليارد تەڭگەگە ءوسىپ، 2,5 تريلليون تەڭگە سوماسىندا جوسپارلانعان.
«ناقتىلاۋ كەزىندە بيىل وڭىرلەرگە رەسپۋبليكالىق بيۋدجەتتەن 7,2 تريلليون تەڭگە نەمەسە بيۋدجەتتىڭ جالپى شىعىستارىنىڭ %32 باعىتتالادى»، - دەدى ۆەدومستۆو باسشىسى.
بۇدان بۇرىن حابارلانعانداي، سەناتتىڭ جالپى وتىرىسىندا ۇلتتىق بانك ءتوراعاسى عالىمجان ءپىرماتوۆ 8 اي قاتارىنان تەرىس كورسەتكىشتە بولعان ىسكەرلىك بەلسەندىلىك وڭالا باستاعانىن ايتتى.