استاناداعى بالاباقشالاردا 2023-جىلى قانداي جۇمىستار اتقارىلادى

استانا. قازاقپارات - استانا قالاسى ءبىلىم باسقارماسىنىڭ باسشىسى قاسىمحان سەنعازىيەۆ قالاداعى بالاباقشالاردى جوندەۋگە جانە ولاردى جابدىقتارمەن قامتاماسىز ەتۋگە قاجەت قاراجات سوماسىن ايتتى، دەپ حابارلايدى قازاقپارات ءتىلشىسى.

«قالادا 56 مىڭنان استام بالانى قامتيتىن 432 مەكتەپكە دەيىنگى ءبىلىم بەرۋ ۇيىمى جۇمىس ىستەپ جاتىر. ونىڭ 99 ى مەملەكەتتىك بالاباقشا ساناتىندا. بالاباقشالاردى قارجىلاندىرۋ جىل سايىن ءوسىپ كەلەدى. دەگەنمەن، شەشىلمەگەن ماسەلەلەر بار. سوڭعى ەكى جىلدا 35 بالاباقشاعا كۇردەلى جوندەۋ جۇرگىزىلدى. وعان 2 ميلليارد تەڭگەدەن اسا قاراجات ءبولىندى. سونىمەن قاتار، قازىرگى كەزدە 6 بالاباقشانىڭ تەحنيكالىق جاعدايىن جاقسارتۋ ءۇشىن كۇردەلى جوندەۋ جۇمىستارىن اتقارۋ كەرەك»، - دەدى ق. سەنعازىيەۆ قالالىق ءماسليحاتتاعى تۇراقتى كوميسسيانىڭ وتىرىسىندا.

ونىڭ ايتۋىنشا، قازىرگى ۋاقىتتا ءبىر بالاباقشادا جوبالاۋ سمەتا قۇجاتتارى ساراپتامادان ءوتىپ، وعان وڭ ناتيجە بەرىلگەن. بۇل باعىتتا كەلەر جىلى 374 ميلليون تەڭگە كەرەك بولادى.

«تاعى ءبىر بالاقشانىڭ جوبالاۋ سمەتا قۇجاتتاماسى بار. ولاردى ساراپتاماعا جىبەردىك. ءۇش بالاباقشادا تەحنيكالىق تەكسەرۋ قورىتىندىسى بويىنشا كۇردەلى جوندەۋ جۇرگىزۋ ءۇشىن ءتيىستى قۇجاتتاردى دايارلاۋ قاجەت»، - دەدى باسقارما باسشىسى.

سونىمەن قاتار ول 2023-جىلى 10 بالاباقشادا جوسپارلى جوندەۋ جۇمىستارىن جۇرگىزۋگە 250 ميلليون تەڭگە سۇراپ وتىرعانىن ايتتى.

«بالاباقشالارداعى ويىن الاڭدارىنىڭ توزىعى جەتىپ وتىر. سوڭعى ءۇش جىلدا بالاباقشالارعا شاعىن ارحيتەكتۋرالىق فورمالار (مالىە ارحيتەكتۋرنىە فورمى) ساتىپ الىنباعان. ولاردىڭ تەحنيكالىق جاعدايى ناشارلاپ كەتكەن. سوندىقتان 73 بالاباقشاعا جالپى سوماسى 1 ميلليارد 825 ميلليون تەڭگەنى قۇرايتىن شاعىن ارحيتەكتۋرالىق فورمالاردى اۋىستىرۋ كەرەك. مۇنىمەن قوسا، بالالار وينايتىن جەرلەردە جاراقات الۋ وقيعالارى ءجيى كەزدەسەدى. 67 بالاباقشادا اسحانا بلوكتارىن اۋىستىرۋ قاجەت. وسى ورايدا 274 ميلليون تەڭگەگە سمەتا جاساپ قويدىق»، - دەدى قاسىمحان سەنعازىيەۆ.

ونىڭ سوزىنە قاراعاندا، كەلەر جىلى 96 بالاباقشادا ويىنشىقپەن جابدىقتاۋعا 184 ميلليون تەڭگە كەرەك بولادى.