تۇركىستاندى 2023 -جىلى تۇركى تىلدەس ەلدەردىڭ تۋريستىك استاناسى ەتۋ ۇسىنىلدى
4 شىلدە 16:46

تۇركىستاندى 2023 -جىلى تۇركى تىلدەس ەلدەردىڭ تۋريستىك استاناسى ەتۋ ۇسىنىلدى

نۇر- سۇلتان. قازاقپارات - كەلەسى جىلى تۇركىستان قالاسى تۇركى تىلدەس ەلدەردىڭ تۋريستىك استاناسى بولۋى مۇمكىن.

بۇل تۋرالى مادەنيەت جانە سپورت ۆيتسە- ءمينيسترى ەرجان ەركىنبايەۆ ءمالىم ەتتى، دەپ حابارلايدى قازاقپارات ءتىلشىسى.

«تۇركىستان - ەلىمىزدەگى تۋريستىك قارقىنى جوعارى وڭىرلەردىڭ ءبىرى. قالانىڭ ينفراقۇرىلىمى جىل ساناپ دامىپ كەلە جاتىر. تۇركىستانعا كولىكتىڭ بارلىق ءتۇرى بارادى. بۇگىندە اتالعان قالادا رەسپۋبليكالىق جانە حالىقارالىق ايتۋلى ءىس- شارالار ءوتىپ جاتىر. ازەربايجاندا وتكەن تۇركى تىلدەس ەلدەردىڭ تۋريزمگە جاۋاپتى مينيسترلەرىنىڭ كەزدەسۋىندە قازاقستان 2023 -جىلى تۇركىستان قالاسىن تۇركى تىلدەس ەلدەردىڭ تۋريستىك استاناسى ەتىپ جاريالاۋدى ۇسىندى. بيىل تۇركىتىلدەس ەلدەردىڭ تۋريستىك استاناسى - باكۋ»، - دەدى ەرجان ەركىنبايەۆ تىلشىلەردىڭ سۇراعىنا جاۋاپ بەرىپ.

ۆيتسە- ءمينيستردىڭ ايتۋىنشا، بيىل تۇركىستانعا تۋريستەردى تارتۋ ماقساتىندا ءبىرقاتار اۋقىمدى شارالار وتكەلى وتىر.

«جىل سوڭىنا دەيىن جوسپارلانىپ وتىرعان ءىس- شارالاردىڭ فورماتى ءارتۇرلى. ونىڭ ىشىندە مادەني، تۋريستىك، سپورتتىق، ويىن- ساۋىقتار، تاعى سول سياقتىلار بار»، - دەيدى ول.

بۇعان دەيىن ەلوردادا تۋريستەرگە ارنالعان جاڭا جوبانىڭ قولعا الىنعانى تۋرالى حابارلاعان ەدىك.

«Neo Nomad 2022» اكسياسىنا قاتىسۋشى تۋريست ءبىر جىلدىڭ ىشىندە ەلىمىزدىڭ 20 ايماعىنا بارىپ، ارنايى قويىلعان جيەكتەمەنىڭ (رامكا) الدىندا سۋرەتكە ءتۇسۋى ءتيىس. وسىلايشا 20 فوتوسۋرەت جيناعان تۋريستكە «زاماناۋي كوشپەندى» مارتەبەسى بەرىلىپ، ەستەلىك سىيلىق تابىس ەتىلەدى.

جاڭالىقتار